​​​​​​           សម្ព័ន្ធភាពរថយន្តឆ្លាតវៃ Harmony (HIMA) ដែលគាំទ្រដោយក្រុមហ៊ុន Huawei បានបញ្ចេញ រូបភាពផ្លូវការនៃរថយន្ត Aito M6 កាលពីថ្ងៃទី 3 ខែកុម្ភៈ ឆ្នាំ 2026 ដោយបញ្ជាក់ ពីតួនាទី របស់ម៉ូដែលនេះនៅក្នុងស្រឡាយរថយន្ត SUV របស់ Aito និងកាលវិភាគសម្ពោធដែលបាន គ្រោងទុក។ យោងតាមប្រភពព័ត៌មានរថយន្តពីប្រទេសចិន រថយន្តនេះត្រូវបានរំពឹងថា នឹងឈានជើងចូលទីផ្សារនៅក្នុងត្រីមាសទី 2 នៃឆ្នាំ 2026 ក្នុងកម្រិតតម្លៃប្រហែល 36,000 ដុល្លារអាមេរិក។

Aito M6 ត្រូវបានកំណត់តំណែងនៅចន្លោះម៉ូដែល Aito M5 និង Aito M7 ទាំងទំហំ និងតម្លៃ។ បច្ចុប្បន្ន Aito M5 មានតម្លៃចាប់ពី 33,100 ដុល្លារអាមេរិក ខណៈដែល Aito M7 មានតម្លៃ​ចាប់ពី 40,300 ដុល្លារអាមេរិក ដែលធ្វើឱ្យ M6 ស្ថិតក្នុងចំណែកទីផ្សាររថយន្ត SUV លក្ខណៈគ្រួសារកម្រិតមធ្យមនៅក្នុងប្រទេសចិន។ ម៉ូដែលនេះមានបំណងពង្រីក​ផលិតផល​របស់ Aito ឱ្យកាន់តែសម្បូរបែប រួមជាមួយម៉ូដែល M5, M7, M8 និង M9។

ការរចនាខាងក្រៅ និងចំណុចលេចធ្លោ៖ ការរចនាផ្នែកខាងក្រៅគឺដើរតាមរចនាបថគ្រួសារ Aito ជាមួយនឹងប៉ាណាមុខបិទជិត និងចង្កៀងមុខដែលមានរាងអូសបន្លាយវែង។ គ្រឿងបង្គុំភ្លើងខាងមុខត្រូវបានបញ្ចូលគ្នាជាមួយរន្ធខ្យល់បញ្ឈរនៅផ្នែកគែមនៃចង្កៀង ខណៈដែលកាងខាងមុខមានរន្ធបឺតខ្យល់បែងចែកជាបីផ្នែក។ លក្ខណៈពិសេសទាំងនេះ​ជួយឱ្យរថយន្តមានភាពខុសប្លែកពីគេនៅក្នុងចំណោមស្រឡាយរថយន្តផ្សេងៗទៀត។

មើលពីចំហៀង Aito M6 ប្រើប្រាស់ដៃទ្វារបែបលាក់មួយផ្នែក (Semi-hidden door handles) និងថាសកង់អាលុយមីញ៉ូមប្រភេទ 5 កាំ ពណ៌ខ្មៅរលោង អមដោយដង្កៀបហ្វ្រាំង​ពណ៌ក្រហម។ រូបរាងតួខ្លួនសង្កត់ធ្ងន់លើភាពរលោង និងព័ត៌មានលម្អិតនៃមុខងារ ដែលស្របតាមសមាមាត្រនៃរថយន្ត SUV ខ្នាតមធ្យមនៅក្នុងត្រកូល Aito។

នៅផ្នែកខាងក្រោយ រថយន្តនេះត្រូវបានគេរំពឹងថានឹងបំពាក់នូវចង្កៀងកន្ទុយរត់កាត់ទទឹង និងមានស្លាប Spoiler នៅលើដំបូល។ កាងខាងក្រោយត្រូវបានតុបតែងដោយបន្ទះ​ខ្មៅនៅផ្នែកខាងក្រោម ដើម្បីផ្តល់នូវភាពស្រស់ស្អាត និងការបែងចែកដាច់ពីគ្នារវាងតួខ្លួន និងផ្នែកបាតរថយន្ត។

បច្ចេកវិទ្យា និងប្រព័ន្ធកម្លាំងម៉ាស៊ីន៖ ប្រភពរថយន្តពីប្រទេសចិនបានបង្ហាញថា Aito M6 នឹងមានជម្រើសជាប្រភេទអគ្គិសនីសុទ្ធ (BEV) និងប្រភេទប្រើម៉ាស៊ីនជំនួយ (Range-extended)។ អ្វីដែលកាន់តែពិសេសនោះ ម៉ូដែលនេះនឹងបំពាក់នូវប្រព័ន្ធកាប៊ីនឆ្លាតវៃ Huawei HarmonyOS Cockpit 5 និងប្រព័ន្ធបើកបរឆ្លាតវៃ Qiankun ជំនាន់ ADS 4 ដែលជាបច្ចេកវិទ្យា Software និងប្រព័ន្ធជំនួយការបើកបរជំនាន់ចុងក្រោយបំផុតរបស់ Huawei។

Aito M6 ត្រូវបានកំណត់តំណែងជារថយន្ត SUV លក្ខណៈគ្រួសារខ្នាតមធ្យម នៅក្នុងប្រព័ន្ធ អេកូឡូស៊ីរថយន្តរបស់ Huawei ដែលការសម្ពោធក្នុងត្រីមាសទី 2 ខាងមុខនេះ នឹងធ្វើឱ្យ វាក្លាយជាជម្រើសដ៏សំខាន់រវាង M5 និង M7 នៅក្នុងទីផ្សាររថយន្តថាមពលថ្មីរបស់ ប្រទេសចិន៕