ក្រុមហ៊ុនផលិតរថយន្តចិន BYD បានបដិសេធជាផ្លូវការចំពោះការអះអាងនៅលើ​បណ្តាញ​សង្គម​ថា ខ្លួនកំពុងអភិវឌ្ឍន៏ ឬនឹងមានការដាក់លក់ រថយន្តដែលអាច​ហោះ ដោយឆ្លើយតប​​ទៅ​នឹងការ​រំពឹងទុកយ៉ាងទូលំទូលាយនៅលើបណ្តាញសង្គមចិន ដែលបានភ្ជាប់​ក្រុមហ៊ុនទៅ​នឹង​គម្រោងបច្ចេកវិទ្យារថយន្ត​អាចហោះហើរបែបទំនើបៗកម្ម។ យោងតាមគេហទំព័រ Sina បានបញ្ជាក់យ៉ាងច្បាស់លាស់​ ដែលបានធ្វើឡើងនៅចំ​ពេល​ដែលឧស្សាហកម្មរថយន្តចិន​ជាច្រើនកំពុងកើនឡើងនូវចំណាប់អារម្មណ៍លើការអភិវឌ្ឍន៍រថយន្តអាចហោះហើរបាន។

កាលពីថ្ងៃទី 29 ខែធ្នូ លោក Li Yunfei អគ្គនាយកនៃក្រុមហ៊ុន BYD Group ទទួលផ្នែក​ទំនាក់ទំនង​​សាធារណៈ បានបកស្រាយនូវពាក្យចចាមអារ៉ាមដែលបានចែកចាយលើបណ្តាញ​សង្គម ដោយបញ្ជាក់​ថា ការអះអាងដែលថា BYD មានគម្រោងផលិតរថយន្តហោះ​គឺជារឿងមិនពិតទេ និងមិនមានមូលដ្ឋានលើផែនការ ឬការរៀបចំរបស់ក្រុមហ៊ុនឡើយ។ លោកបានសង្កត់ធ្ងន់ទៀតថា ចំពោះមុខការរំពឹងទុកតាមប្រព័ន្ធអ៊ីនធឺណិតដែលមានអ្នក​តាមដាន​ច្រើ​​នបែបនេះ ការរក្សាភាព​អត់ធ្មត់គឺជាភាពចាំបាច់។

ប្រភពនៃពាក្យចចាមអារ៉ាម

ការបដិសេធនេះបានធ្វើឡើងបន្ទាប់ពីមានការចែកចាយយ៉ាងរហ័សនូវការបង្ហោះតាមបណ្តាញ​សង្គម និងវីដេអូខ្លីៗដែលចោទប្រកាន់ថា Yangwang ដែលជាម៉ាកយីហោរថយន្ត​ប្រណីតកម្រិត​ខ្ពស់របស់ BYD កំពុងរៀបចំគម្រោងក្នុងការផលិតរថយន្តហោះក្រោមឈ្មោះថា Ufly។ ប្រភពទាំងនោះបានលើកឡើងថាវាបំពាក់នូវបច្ចេកវិទ្យាសាកថ្មលឿនកម្រិតមេហ្គាវ៉ាត់ (megawatt-level fast-charging) និងក្រោមស្ថាបត្យកម្មដ៏ទំនើបសម្បូរបែប។ តាមប្រភពដែលមិនមានការបញ្ជាក់ទាំងនេះថែមទាំងបានលើកឡើងអំពីព័ត៌មានលម្អិតនៃសមត្ថភាពដែលជារឿងប្រឌិត និងអះអាងថាមានការហោះហើរសាកល្បងត្រូវបាន​បញ្ចប់​ទៀតផង។ ការឆ្លើយតបជាផ្លូវការរបស់ BYD បានបញ្ជាក់យ៉ាងច្បាស់ថា របាយការណ៍ទាំងនោះគឺជារឿងប្រឌិត និងមិនមានមូលដ្ឋានលើព័ត៌មានអភិវឌ្ឍន៍ផលិតផល​ដែលបាន​​​ផ្ទៀងផ្ទាត់ណាមួយឡើយ។

ស្ថានភាពឧស្សាហកម្មរថយន្តហោះនៅចិន

ទោះបីជា BYD បានបដិសេធក៏ដោយ ក៏ការចាប់អារម្មណ៍លើបច្ចេកវិទ្យារថយន្តហោះកំពុង​កើនឡើងនៅក្នុងផ្នែកខ្លះនៃវិស័យរថយន្ត និងអវកាសរបស់ប្រទេសចិន។ ក្រុមហ៊ុនផលិតរថយន្តធំៗដូចជា Xpeng, Geely (តាមរយៈក្រុមហ៊ុនបុត្រសម្ព័ន្ធ Aerofugia), GAC, Changan, និង FAW សុទ្ធតែបានប្រកាសជាសាធារណៈ​អំពីការស្រាវជ្រាវលើ​យានយន្តហោះ​កម្ពស់ទាប ឬប្រព័ន្ធហោះហើរបែប Hybrid។ ក្រុមហ៊ុនមួយចំនួនបានឈានដល់ការបង្កើតគំរូដើម (prototypes), ចូលក្នុងដំណើរការបញ្ជាក់​វិញ្ញាបនបត្រ ឬបានដាក់បង្ហាញគោលគំនិតរថយន្តហោះនៅក្នុងព្រឹត្តិការណ៍​ឧស្សាហកម្ម​នានា។

ជាឧទាហរណ៍ របាយការណ៍បានបង្ហាញថា ក្រុមហ៊ុនបុត្រសម្ព័ន្ធយានយន្តអាកាសរបស់ Xpeng បានចាប់ផ្តើមផលិតរថយន្តហោះ Hybrid សាកល្បងហើយ ហើយគម្រោងរបស់​ក្រុមហ៊ុនផលិតផ្សេង​ទៀតកំពុងស្ថិតក្នុងដំណើរការអនុម័តបទប្បញ្ញត្តិ ឬគ្រោងនឹងដាក់លក់​ផលិតផល​យ៉ាងឆាប់បំផុតនៅឆ្នាំ 2026។ ការវិវឌ្ឍន៍ទាំងនេះគឺផ្ទុយស្រឡះពីគោលជំហរផ្លូវ​ការ​​របស់ BYD ដែលមិនបានបញ្ជាក់ពីកម្មវិធីបែបនេះឡើយ។

ការបញ្ជាក់ច្បាស់នាពេលថ្មីៗនេះពី BYD មិនបានយោងទៅលើការស្រាវជ្រាវផ្ទៃក្នុង ឬផែនការណាមួយក្នុងវិស័យបច្ចេកវិទ្យាហោះហើរនោះទេ។ វាផ្តោតតែលើការកែតម្រូវ​ព័ត៌មាន​មិនត្រឹមត្រូវ និងការអះអាងថាខ្លួនមិនមានគម្រោងផលិត​រថយន្តហោះជាផ្លូវការណា​មួយឡើយ៕