កាលពី​ថ្ងៃ​ទី 9ខែ​ធ្នូ 2025 រថយន្ត​ទី 30 លានគ្រឿង របស់ Changan បាន​រំកិល​ចេញពី​ខ្សែ​សង្វាក់​ផលិតកម្ម​ក្នុង​ប្រទេស​ចិន​ចាប់តាំងពីម៉ាកយីហោមួយនេះឈានជើង​​ចូល​ក្នុង​ឧស្សាហកម្ម​រថយន្ត​ក្នុង​ឆ្នាំ1983 ដោយ​ចំណាយ​ពេល​ជិត 40 ឆ្នាំ ដែល​ធ្វើ​ឲ្យ​វា​ក្លាយជា​ក្រុមហ៊ុន​ផលិត​រថយន្ត​ចិន​ឯករាជ្យ​ដំបូង​គេ​ដែល​សម្រេច​បាន​ស្នាដៃ​នេះ។ ទោះជាយ៉ាងណា ចាប់ពី​រថយន្ត​ទី 20លាន ដល់​ទី 30លានគ្រឿង ក្រុមហ៊ុនChangan ចំណាយ​ពេល​ត្រឹមតែ បួន​ឆ្នាំ ប៉ុណ្ណោះ។ បច្ចុប្បន្ននេះក្រុមហ៊ុន Changan មានម៉ាក​ម៉ូដែលរថយន្ត​ផ្សេងទៀត​ចំនួន 5 រួម​មាន Avatr, Nevo, Deepal, Changan, និង Kaicheng។

កាលពី​ថ្ងៃ​ទី 29 ខែ​កក្កដា2025 មានការ​រៀបចំកំណែទំរង់​ឡើងវិញ​របស់ China Changan Automobile Group Co., Ltd. ត្រូវ​បាន​បង្កើត​ឡើង​ជា​ផ្លូវការ​ជាសហគ្រាស​រដ្ឋ​ថ្មី​ក្រោម​ការ​គ្រប់គ្រង​ផ្ទាល់​ពី​រដ្ឋាភិបាល​ថ្នាក់កណ្តាលចិន រួម​ជាមួយ FAW និង Dongfeng។ ក្នុង​សន្និសីទ​សារព័ត៌មាន​លើក​ដំបូង លោក Zhu Huarong ប្រធាន​ក្រុមហ៊ុន​បាន​ថ្លែង​ថា ក្រុមហ៊ុន​មាន​គោលបំណង​សម្រេច​បាន​បរិមាណ​ក្នុងការផលិត និង​ការ​លក់អោយបានចំនួន 5 លាន​គ្រឿង ត្រឹម​ឆ្នាំ 2030 ដោយ​ប្រភេទយានយន្ត​ប្រើប្រាស់​ថាមពល​ថ្មី (NEVs) ដែលមាន​ចំនួន​លើស​ដល់ 60% នៃ​ការ​លក់ និង​ការ​លក់​នៅ​ក្រៅ​ប្រទេស​មាន​ចំនួន​លើសដល់ 30%។ ក្រុមហ៊ុន​ផលិត​រថយន្ត​ផ្សេងទៀត​ដែល​សម្រេច​បាន​ស្នាដៃ​នេះ​រួម​មាន SAIC-GM-Wuling (SGMW) និង FAW-Volkswagen joint ventures កាលពី​ដើម​ឆ្នាំ​នេះ​ក្នុង​ប្រទេស​ចិន។ សម្រាប់​ការ​ប្រៀបធៀប FAW-Volkswagen ចំណាយ​ពេល 34 ឆ្នាំ ដើម្បី​ឈាន​ដល់​ស្នាដៃ​នេះ ហើយ Volkswagen បានចំណាយ​ពេលរហូតដល់ 46 ឆ្នាំ។

Avatr vehicle lineup.

ក្នុង​ខែ​វិច្ឆិកាកន្លងទៅនេះ Changan លក់រថយន្ត​បានចំនួន 283,000 គ្រឿង ដែល​ជា​ការ​កើនឡើង 2.3% ធៀប​នឹង​ឆ្នាំ​មុន។ នេះ​រួមបញ្ចូលជាមួយប្រភេទរយន្តប្រើប្រាស់​NEVs ចំនួន 125,000 គ្រឿង ដែល​ជា​ការ​កើនឡើង 23% បើធៀប​នឹង​ឆ្នាំ​មុន និង​ការ​លក់​នៅ​ក្រៅ​ប្រទេសចំនួន 55,000 គ្រឿង ដែល​ជា​ការ​កើនឡើង 47% បើធៀប​នឹង​ឆ្នាំ​មុន។ ជាពិសេស Changan ជាប់​ចំណាត់ថ្នាក់​ទី 11 ក្នុង​ការ​នាំចេញរថយន្តប្រភេទ NEV កាលពី​ខែ​មុន ដោយ​នាំចេញ​បាន​ត្រឹមតែចំនួន​​​ 4,189 គ្រឿង ប៉ុណ្ណោះ ដែល​នៅ​ពីក្រោយ​ក្រុមហ៊ុន NEV startups រួម​ទាំង Xpeng និង Leapmotor។

ក្រឡេកទៅមើល​ពិព័រណ៍នៅ Guangzhou Auto Show ឆ្នាំ 2025 កាលពី​ខែ​មុន Changan បាន​ប្រកាស​ថា​ខ្លួន​គ្រោង​នឹង​ដាក់​លក់​ម៉ូដែល NEV ជាង 50 ម៉ូដែល ត្រឹម​ឆ្នាំ 2030 ដែល​ម៉ូដែល​ទាំងអស់​នឹង​ត្រូវ​បំពាក់​ដោយ​បច្ចេកវិទ្យា​ឆ្លាតវៃ Tianshu ថ្មី​របស់ Changan ដោយ​គ្របដណ្តប់​លើរថយន្ត SUVs, MPVs ទំហំ​មធ្យម​រហូតដល់ទំហំ​ធំ, និង​យានយន្ត off-road។

Deepal vehicle lineup.

សម្រាប់រថយន្តម៉ូដែលផ្សេងទៀតរបស់ក្រុមហ៊ុន Changan ដូចជា Avatr កាលពី​ខែ​មុន លក់​បានចំនួន 14,057 គ្រឿង, Deepal លក់​បានចំនួន 33,060 គ្រឿង, និង Nevo លក់​បានចំនួន 46,909 គ្រឿង។ ក្នុងពេល​ជាមួយ​គ្នា​នេះដែល ការនាំចេញរបស់ Deepal ​សរុបបាន​ឈាន​ដល់ ចំនួន​​700,000 គ្រឿង៕