ក្រុមហ៊ុន Ford បានចេញលិខិតប្រកាសប្រមូលរថយន្តជាងកន្លះលានគ្រឿង នៅក្នុងស្រឡាយម៉ូដែល Bronco និង Bronco Raptor ត្រឡប់មកវិញ។ ឯកសារដែលបានដាក់ជូនរដ្ឋបាលសុវត្ថិភាពចរាចរណ៍ផ្លូវគោកជាតិអាមេរិក (NHTSA) បង្ហាញថា ក្រុមហ៊ុន Ford កំពុងប្រមូលរថយន្ត SUV ម៉ូដែល Bronco និង Bronco Raptor ចំនួន 565,691 គ្រឿង ស៊េរីឆ្នាំ 2021–2026 ត្រឡប់មកវិញ។

យោងតាមឯកសាររបស់ NHTSA ការប្រមូលរថយន្តត្រឡប់មកវិញនេះ គឺជារឿងចាំបាច់ ដោយសារតែបណ្តាញខ្សែភ្លើង (wiring harness) នៅក្នុងប្លុកម៉ាស៊ីនអាចនឹងឆ្លងសៀគ្វី (short-circuit) បង្កើតឱ្យមានផ្កាភ្លើង និងអាចបង្កឱ្យមានអគ្គិភ័យកើតឡើង។ របាយការណ៍នៅក្នុងឯកសារបានបញ្ជាក់ថា ប្រព័ន្ធការពារការកកិតនៅលើបណ្តាញខ្សែភ្លើងមានកម្រិតមិនគ្រប់គ្រាន់ ដែលអនុញ្ញាតឱ្យមានការកកិតរវាងខ្សែភ្លើង និងផ្នែកក្បែរៗនោះ រហូតធ្វើឱ្យលេចចេញខ្សែភ្លើងខាងក្នុង។ ប្រសិនបើសិនជាករណីនេះកើតឡើង ខ្សែភ្លើងដែលលេចចេញមកនោះ អាចនឹងឆ្លងសៀគ្វីជាចន្លោះៗ បង្កើតជាធ្នូភ្លើង (arcs) និងអាចបង្កឱ្យមានអគ្គិភ័យឆេះនៅក្នុងប្លុកម៉ាស៊ីន។

យោងតាមលិខិតស្នាមនៃការប្រមូលរថយន្ត ករណីឆ្លងសៀគ្វីនៅក្នុងប្លុកម៉ាស៊ីន អាចបណ្តាលឱ្យមានផ្សែងហុយចេញតាមរន្ធខ្យល់ម៉ាស៊ីនត្រជាក់ក្នុងកាប៊ីន។ អ្នកបើកបរក៏អាចនឹងទទួលបានការជូនដំណឹងអំពីបញ្ហានេះ តាមរយៈសារព្រមាននៅលើអេក្រង់កុងទ័រផងដែរ។ ឯកសារប្រមូលរថយន្តបានបង្ហាញថា នៅពេលដាក់លិខិត ក្រុមហ៊ុន Ford បានដឹងពីឧបទ្ទវហេតុចំនួន 15 ករណី ដែលពាក់ព័ន្ធនឹងអគ្គិភ័យ ដែលអាចចាប់ផ្តើមចេញពីបណ្តាញខ្សែភ្លើងនៅក្នុងប្លុកម៉ាស៊ីន។

ម្ចាស់រថយន្តដែលរងផលប៉ះពាល់ នឹងត្រូវបានជូនដំណឹង និងទទួលបានការបកស្រាយឱ្យយករថយន្ត Bronco របស់ពួកគេទៅកាន់ដេប៉ូចែកចាយរបស់ Ford ដើម្បីទទួលបានសេវាកម្មជួសជុល។ ក្រុមបច្ចេកទេសនៅតាមដេប៉ូ នឹងដំឡើងស្រោមការពាររលក (convolute sheathing) ជាមួយស្កុតការពារការកកិត (abrasion tape) ទៅលើបណ្តាញខ្សែភ្លើង ដើម្បីការពារការដាច់រលាត់ និងកាត់បន្ថយហានិភ័យនៃការឆ្លងសៀគ្វីនាពេលអនាគត។ ការជូនដំណឹងទៅកាន់ដេប៉ូចែកចាយបានចាប់ផ្តើមរួចហើយ ដោយក្រុមហ៊ុន Ford មានផែនការជូនដំណឹងទៅកាន់ម្ចាស់រថយន្ត ក្នុងចន្លោះថ្ងៃទី 24 ដល់ថ្ងៃទី 28 ខែសីហា2026ខាងមុខនេះ។