ក្រុមហ៊ុន GAC Aion ដែល​ជា​បុត្រសម្ព័ន្ធ​រថយន្ត​អគ្គិសនី​របស់ GAC Group នឹង​ចាប់ផ្តើម​ការ​ប្រកាសលក់ (Pre-Sales) ​សម្រាប់​ម៉ូដែល i-60 ថ្មី​របស់​ខ្លួន​នៅ​ថ្ងៃទី 3 ខែ​វិច្ឆិកា2025 ដោយ​ហៅ​វា​ថា​ជា​រថយន្ត​អគ្គិសនី​ EREV (EREV - extended-range electric vehicle) ដំបូង​របស់​ខ្លួន។

ម៉ូដែល​នេះ​បាន​ប្រកាស​កាលបរិច្ឆេទ​នេះ​នៅ​លើគេហទំព័រ Weibo នា​ថ្ងៃនេះ ដោយ​បញ្ចេញ​រូបភាព​ផ្លូវការ​ជាច្រើន។

យោង​តាម​ឯកសារ​បទប្បញ្ញត្តិ រថយន្ត Aion i-60 គឺ​ជា​រថយន្ត SUV ប្រាំ​កៅអី​ដែល​មាន​ប្រវែង 4,685mm, ទទឹង 1,854mm, និង​កម្ពស់ 1,660mm ព្រមទាំង​មាន​គម្លាត​កង់ (wheelbase) 2,775mm។ រថយន្ត SUV នេះ​នឹង​មាន​ជម្រើស​ទាំង​ម៉ូដែល EREV និង​ម៉ូដែល BEV (battery electric vehicle)។ ម៉ូដែល EREV បំពាក់​ដោយ​ឧបករណ៍​ range extender កម្លាំង 74 គីឡូវ៉ាត់ (kW) ខណៈ​ម៉ូដែល BEV បំពាក់​ដោយ​ម៉ូទ័រ​អគ្គិសនី​ដែល​ផ្តល់​កម្លាំង​អតិបរមា 150គីឡូវ៉ាត់ ឬ 165 គីឡូវ៉ាត់។

គួរ​កត់សម្គាល់​ថា ទោះបីជា GAC Aion បាន​និយាយ​ថា i-60 ជា​ម៉ូដែល EREV ដំបូង​របស់​ខ្លួន​ក៏ដោយ ក៏​ម៉ូដែលរង (sub-brand) Hyptec របស់​ខ្លួន​បាន​សម្ពោធ​ម៉ូដែល EREV នៃ Hyptec HL កាលពី​ខែ​សីហា​កន្លងរួច​មក​ហើយ។

រថយន្ត Hyptec HL EREV គឺ​ជា​ម៉ូដែល​ដំបូង​ដែល​ប្រើប្រាស់​បច្ចេកវិទ្យា​ Xingyuan របស់ GAC ដែល​មាន​អាគុយ Freevoy Super Hybrid Battery មានទំហំ 60 គីឡូវ៉ាត់​ម៉ោង (kWh) ដែល​ផ្គត់ផ្គង់​ដោយ CATL ដោយ​ផ្អែក​លើ​ថាមពលថ្ម​នីកែល-កូបាល់-ម៉ង់កាណែស ហើយ​ផ្តល់​ចម្ងាយ​បើកបរ​ដោយ​អាគុយ (CLTC battery range) 350 គីឡូម៉ែត្រ។

វា​អាចសាក​ថ្ម​លឿន​បំផុតបាន 800V (5C ultra-fast charging) ក្នុង​រយៈពេល​ត្រឹមតែ 10នាទី​ប៉ុណ្ណោះ​​ ​អាច​​​បើកបរបានចម្ងាយ 210 ​គីឡូម៉ែត្រ។ ជាមួយនឹង​ធុង​សាំង​ពេញ និង​អាគុយ​សាក​ពេញ រថយន្ត Hyptec HL EREV សម្រេច​បាន​ចម្ងាយ​បើកបរ​រួម​បញ្ចូល​គ្នា (CLTC combined range) 1,369 គីឡូម៉ែត្រ៕