ថ្ងៃនេះ ក្រុមហ៊ុន Geely Auto បានប្រកាសជាផ្លូវការនូវបច្ចេកវិទ្យាសាកភ្លើង «បញ្ជាដោយ AI» របស់ខ្លួន គឺ «Geely Smart Charge» ដែលដំណើរការដោយគំរូថាមពលខ្នាតធំ (energy large model) របស់ Geely មានឈ្មោះថា Xingrui PowerMind។ ចំណុចសំខាន់នៃការប្រកាសនេះ គឺស្ថានីយសាកភ្លើង Geely Smart Charge ថ្មី ដែលមានកម្លាំងទិន្នផលថាមពលកំពូលនៃក្បាលសាកតែមួយ (single-gun peak power output) រហូតដល់ 2,250 kW ដែលបង្កើតនូវកំណត់ត្រាថ្មីនៅក្នុងឧស្សាហកម្មនេះ។

យោងតាម Geely ក្រុមហ៊ុនបានរៀបចំបញ្ចូលគ្នានូវគំរូថាមពល Xingrui PowerMind ដើម្បីបើកឱ្យដំណើរការនូវមុខងារស្នូលចំនួនបី៖ Extreme Charge, Smart Charge និង Auto Charge។ ដោយប្រើប្រាស់អាល់កូរីតទស្សន៍ទាយសីតុណ្ហភាព (thermal prediction algorithms) ប្រព័ន្ធនេះអាចទស្សន៍ទាយការប្រែប្រួលសីតុណ្ហភាពអាគុយបានមុន 30 វិនាទី ដោយកែសម្រួលកម្លាំងសាកភ្លើងតាមស្ថានភាពជាក់ស្តែង ដើម្បីរក្សាសីតុណ្ហភាពមធ្យមរបស់អាគុយឱ្យនៅក្រោម 55 អង្សាសេ និងសីតុណ្ហភាពកំពូលឱ្យស្ថិតនៅក្រោម 65 អង្សាសេយ៉ាងម៉ឺងម៉ាត់។

យោងតាមទិន្នន័យធ្វើតេស្តពីមជ្ឈមណ្ឌលស្រាវជ្រាវ និងបច្ចេកវិទ្យាយានយន្តចិន (CATARC) រថយន្តម៉ូដែល Lynk & Co 10 ដែលបំពាក់បច្ចេកវិទ្យានេះ សម្រេចបានកម្លាំងសាកភ្លើងកំពូលរហូតដល់ 1,093 kW។ ក្នុងអំឡុងពេលសាកភ្លើងពី 10% ទៅ 97% អាគុយបានរក្សាសីតុណ្ហភាពនៅក្រោម 55អង្សាសេ ក្នុងរយៈពេល 57% នៃពេលវេលាសាកសរុប ដោយមានសីតុណ្ហភាពអតិបរមាដែលត្រួតពិនិត្យឃើញគឺ 64 អង្សាសេ។

បច្ចេកវិទ្យាអាគុយ

Geely ក៏បានណែនាំផងដែរនូវអាគុយផ្លាតខ្លីខ្លាំង (ultra-short blade batteries) ជំនាន់ថ្មី Aegis Golden Brick របស់ខ្លួន៖

• អាគុយប្រភេទ 12C៖ ដែលមានបំពាក់នៅលើរថយន្ត Lynk & Co 10 និង Zeekr 001 អាគុយប្រវែង 395 មីឡីម៉ែត្រមួយនេះ សម្រេចបានអត្រាសាកភ្លើងកំពូលកម្រិត 12C។ ក្រោមសីតុណ្ហភាពធម្មតា វាអាចសាកពី 10% ទៅ 70% ក្នុងរយៈពេលប្រហែល 4 នាទី និង 30 វិនាទី ហើយពី 10%ទៅ 97% ក្នុងរយៈពេលប្រហែល 8នាទី និង40 វិនាទី។
• អាគុយប្រភេទ 6C៖ ប្រភេទប្រវែង 370 មីឡីម៉ែត្រ ដែលបង្ហាញខ្លួនជាលើកដំបូងនៅក្នុងរថយន្ត Geely Galaxy E5 ថ្មី ផ្តល់នូវអត្រាសាកភ្លើងកំពូលកម្រិត 6C ដោយសម្រេចបានការសាកពី 10% ទៅ 70% ក្នុងរយៈពេលប្រហែល 8 នាទី និង 25 វិនាទី។

ហេដ្ឋារចនាសម្ព័ន្ធ និងកញ្ចប់លើកទឹកចិត្ត

នៅត្រឹមចុងឆ្នាំ 2027 ក្រុមហ៊ុនមានគោលដៅដាក់ពង្រាយក្បាលសាកភ្លើងឱ្យបានលើសពី 100,000 ក្បាលនៅទូទាំងប្រទេស ដោយក្នុងនោះជាង 50,000 ក្បាលជាប្រភេទ Geely Smart Charge ដែលធានាបាននូវការគ្របដណ្តប់នៅទូទាំងគ្រប់ស្រុក/ខណ្ឌ នៅក្នុងប្រទេសចិន។

ដើម្បីគាំទ្រដល់ការដាក់ប្រកាសនេះ Geely បានប្រកាសពីគោលនយោបាយលើកទឹកចិត្តអ្នកប្រើប្រាស់ថ្មី។ ម្ចាស់ដំបូងគេនៃម៉ូដែលថ្មីៗដែលបំពាក់បច្ចេកវិទ្យា Geely Smart Charge នឹងទទួលបានប្រាក់ឧបត្ថម្ភការសាកភ្លើងចំនួន 150 ដុល្លារអាមេរិក ក្នុងមួយឆ្នាំ សម្រាប់រយៈពេលពីរឆ្នាំ (សរុបចំនួន 300 ដុល្លារ) ដែលមានសុពលភាពសម្រាប់យានយន្តដែលបានទិញមុនថ្ងៃទី 1 ខែមករា ឆ្នាំ 2028។ លើសពីនេះ ការធានាអាគុយសម្រាប់ទាំងម៉ូដែលថ្មី និងម៉ូដែលបច្ចុប្បន្នដែលមានលក្ខណៈសម្បត្តិគ្រប់គ្រាន់ ត្រូវបានដំឡើងកម្រិតពី 8 ឆ្នាំ/150,000 គីឡូម៉ែត្រ ទៅ 8 ឆ្នាំ/200,000 គីឡូម៉ែត្រ។

មតិរបស់អ្នកសម្រួលអត្ថបទ (Editor’s comment)

Geely បានណែនាំបច្ចេកវិទ្យានេះតាំងពីខែមេសាឆ្នាំនេះមកម្ល៉េះ ហើយយើងក៏បានរាយការណ៍អំពីវានាពេលនោះដែរ។ នៅពេលដែលការសាកភ្លើងឈានដល់កម្រិតមេហ្គាវ៉ាត់ (megawatt) ការកែលម្អលើរយៈពេលសាកភ្លើងហាក់ដូចជាមានកម្រិតលីមីតខ្លាំងណាស់ ហើយល្បឿនសាកដែលបានបង្ហាញនេះ តាមពិតទៅគឺយឺតជាងអាគុយ Shenxing ជំនាន់ទីបីរបស់ CATL ទៅទៀត។ ដើម្បីប្រកួតប្រជែងជាមួយ BYD ត្រឹមតែល្បឿនសាកភ្លើងមួយមុខគឺមិនទាន់គ្រប់គ្រាន់នោះទេ ការកសាងស្ថានីយសាកភ្លើងគឺជារឿងសំខាន់បំផុត។ យ៉ាងណាមិញ ក្រុមហ៊ុន BYD នឹងបញ្ចប់ការសាងសង់ស្ថានីយសាកភ្លើងល្បឿនលឿនខ្លាំង (flash-charging stations) ចំនួន 20,000 កន្លែងនាឆ្នាំនេះ។