អស់រយៈពេលជាច្រើនឆ្នាំមកនេះ អ្នកជិះម៉ូតូតែងតែសួរសំណួរដដែលៗថា៖ តើនៅពេលណា ដែលក្រុមហ៊ុន Honda នឹងផ្តល់ឱ្យយើងនូវម៉ូតូ Super Cub អគ្គិសនី ដែលមានរូបរាង ដើម ពិតប្រាកដ?

ម៉ូតូ Honda Super Cub ដែលប្រើសាំង មិនមែនគ្រាន់តែជាម៉ូតូតូចមួយក្នុងប្រវត្តិសាស្ត្រ ដ៏វែងឆ្ងាយនៃម៉ូតូឌុប និងម៉ូតូខ្នាតតូចនោះទេ។ វាគឺជាយានយន្តដែលលក់ដាច់បំផុតក្នុង ប្រវត្តិសាស្ត្រ ដោយមានចំនួនផលិតច្រើនជាង 100 លានគ្រឿង ចាប់តាំងពីការបង្ហាញ​ខ្លួនដំបូង​ក្នុងឆ្នាំ 1958។ ម៉ូដែល Cub បានជួយជំរុញវិស័យយានយន្តក្នុងប្រទេសជប៉ុន ក្រោយសម័យសង្គ្រាម បង្កើនលទ្ធភាពនៃការប្រើប្រាស់មធ្យោបាយធ្វើដំណើរ នៅទូទាំង អាស៊ីអាគ្នេយ៍ ហើយថែមទាំងទទួលបានការគាំទ្រយ៉ាងខ្លាំងនៅក្នុងសហរដ្ឋអាមេរិក តាមរយៈរចនាបថតួខ្លួនដែលងាយស្រួលឡើងជិះ និងរូបរាងដែលផ្តល់ភាពជិតស្និទ្ធ។ វាមិនមែនជាការនិយាយហួសហេតុនោះទេ ដែលថា Super Cub គឺជាយានយន្ត ដ៏សំខាន់បំផុតមួយដែលមិនធ្លាប់មាន។ នេះហើយគឺជាមូលហេតុដែលធ្វើឱ្យការអវត្តមាននៃ កំណែអគ្គិសនីពិតប្រាកដ មើលទៅហាក់ដូចជាចំណុចខ្វះខាតដ៏ធំមួយ។

វាជារឿងសំខាន់ដែលត្រូវកត់សម្គាល់ថា Honda មិនមែននៅស្ងៀមចំពោះការធ្វើអគ្គិសនីកម្ម ក្នុងឧស្សាហកម្មយានយន្តដែលមានពីរកង់នោះទេ។ ទោះបីជាក្រុមហ៊ុនចំណាយពេល​យូរបន្តិច ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ យើងឃើញមានការដេញតាម​យ៉ាងខ្លាំងក្លា។ Honda បានដាក់ចេញនូវយានយន្តអគ្គិសនីដែល​មានកង់ពីរខ្នាតតូច​ជាច្រើន រួមមានម៉ូដែលដូចជា Honda EM1 e: និង Honda CUV e:។ ម៉ូតូស្កូតឺទាំងនេះ ដែលផ្តោតជា​សំខាន់លើ​ទីផ្សារទីក្រុងក្នុងតំបន់អាស៊ី និងអឺរ៉ុប ប្រើប្រាស់អាគុយដែលអាចដោះដូរបាន (Mobile Power Pack) និងដៅលើផ្នែកម៉ូតូដែលស្មើនឹងកម្លាំង 50cc ដល់ 125cc។

តាមមើលទៅ វាហាក់ដូចជាមូលដ្ឋានគ្រឹះដ៏ល្អសម្រាប់ផលិតផល Cub អគ្គិសនី។

ប៉ុន្តែរហូតមកដល់ពេលនេះ Honda នៅមិនទាន់បានផ្តល់នូវអ្វីដែលអ្នកគាំទ្រពិតជាចង់ បាននៅឡើយទេ៖ នោះគឺម៉ូតូ Super Cub EV ដែលមានរូបរាងស្គាល់ច្បាស់ អាចជិះលើ ផ្លូវបាន និងរក្សាបាននូវស្មារតីព្រមទាំងអត្ថប្រយោជន៍នៃម៉ូដែលដើម ខណៈពេលដែល ផ្តល់នូវសមត្ថភាពជាម៉ូតូអគ្គិសនីដ៏ទំនើប។

វាធ្លាប់មានម៉ូដែលដែលស្ទើរតែដូចគ្នាទៅហើយ គឺម៉ូដែលគេហៅថា Honda Cub e: ដែលដាក់លក់ក្នុងទីផ្សារអាស៊ីមួយចំនួន និងមានរូបរាងទទួលបានការបំផុសគំនិតពី Cub។ ប៉ុន្តែបើនិយាយពីសមត្ថភាពវិញ វាប្រហាក់ប្រហែលទៅនឹងកង់អគ្គិសនីល្បឿនយឺតប៉ុណ្ណោះ។ ជាមួយនឹងកម្លាំងតិចតួច ល្បឿនអតិបរមាមានកម្រិត និងលក្ខណៈបច្ចេកទេសដែលស៊ីគ្នាទៅ​នឹងច្បាប់កង់អគ្គិសនីក្នុងស្រុកជាងស្តង់ដារម៉ូតូ វាផ្តល់អារម្មណ៍ថាជា "កង់អគ្គិសនីដ៏គួរឱ្យ​ស្រឡាញ់ដែលគ្របដណ្តប់ដោយតួខ្លួនស្កូតឺ" ជាជាង Super Cub អគ្គិសនីពិតប្រាកដ។

Honda Super Cub 50 1960

វាមិនមែនជាផលិតផលមិនល្អសម្រាប់ទីផ្សារគោលដៅដែលមានគន្លងផ្លូវសម្រាប់កង់ និងស្កូតឺល្បឿនយឺតក្នុងតំបន់អាស៊ីនោះទេ។ ប៉ុន្តែវាមិនមែនជា Super Cub ជំនាន់ក្រោយ​សម្រាប់​ពិភពលោក ដែលអ្នកជិះជាច្រើនក្នុងសហរដ្ឋអាមេរិក និងអឺរ៉ុបបានសង្ឃឹមទុក​នោះទេ។ ហើយវាក៏ពិតជាមិនមែនជាម៉ូតូអគ្គិសនីខ្នាតតូចដែលនឹងនាំយកមកវិញនូវអារម្មណ៍​នឹកកាលពីទសវត្សរ៍ឆ្នាំ 60 និង 70 នោះដែរ។

Honda ធ្លាប់បានបង្ហាញម៉ូតូគំរូ EV-Cub concept ដ៏ស្រស់ស្អាតកាលពីជាងមួយទសវត្សរ៍មុន ដែលមើលទៅដូចជាការបកស្រាយឡើងវិញនូវម៉ូដែលដើមតាមបែបអគ្គិសនីយ៉ាងត្រឹមត្រូវបំផុត។ ទោះជាយ៉ាងណាក៏ដោយ ចាប់តាំងពីពេលនោះមក យុទ្ធសាស្ត្រអគ្គិសនីរបស់ក្រុមហ៊ុន ហាក់មានលក្ខណៈសន្សឹមៗ និងផ្តោតលើតំបន់ជាចម្បង។ ជាជាងការដាក់សម្ពោធម៉ូដែល អគ្គិសនីលំដាប់កំពូលក្រោមឈ្មោះម៉ាកល្បីៗតាំងពីដើម Honda បែរជាផ្តល់អាទិភាព ដល់គ្រោងឆ្អឹងយានយន្តដែលអាចពង្រីកបាន (scalable platforms) នៅក្នុងទីផ្សារ ដែលម៉ូតូកម្លាំងតូចកំពុងគ្របដណ្តប់លើការដឹកជញ្ជូនប្រចាំថ្ងៃ។

តាមទស្សនៈអាជីវកម្ម វិធីសាស្ត្រនេះគឺសមហេតុផល។ អាស៊ីអាគ្នេយ៍ និងផ្នែកខ្លះនៃអឺរ៉ុប តំណាងឱ្យទីផ្សារដ៏ធំសម្បើមក្នុងប្រភេទយានយន្តកង់ពីខ្នាតតូច។ ការបញ្ជាក់ឱ្យឃើញពី​ប្រសិទ្ធភាព​នៃប្រព័ន្ធដោះដូរអាគុយ និងយានយន្តអគ្គិសនីក្នុងក្រុងតម្លៃសមរម្យនៅទីនោះ គឺជារឿងយុទ្ធសាស្ត្រជាងការដាក់លក់ Cub អគ្គិសនីបែបបុរាណនៅក្នុងអាមេរិកខាងជើង។

Honda Super Cub 50 1960

ទោះជាយ៉ាងណា តម្រូវការពិតប្រាកដនៅតែមាន។ ម៉ូតូ Super Cub អគ្គិសនី ដែលមាន​សមត្ថភាពរត់​បានល្បឿន 80 គីឡូម៉ែត្រក្នុងមួយម៉ោង 50mph, ចម្ងាយជិះបានសមរម្យ និងការគាំទ្រពីភ្នាក់ងារចែកចាយរបស់ Honda នៅទូទាំងសកលលោក ទំនងជានឹងទទួល បានការគាំទ្រយ៉ាងខ្លាំង។ វានឹងក្លាយជាស្ពានចម្លងរវាងក្រុមហ៊ុនផលិតម៉ូតូអគ្គិសនីខ្នាតតូច និងម៉ូតូអគ្គិសនីកម្លាំងខ្លាំង ដោយផ្តល់នូវអ្វីដែលគួរឱ្យទាក់ទាញ ជាក់ស្តែង និងមានតម្លៃ ជាប្រវត្តិសាស្ត្រ។

តើយើងនឹងបានឃើញវាដែរឬទេ?

Honda បានប្តេជ្ញាជាសាធារណៈថានឹងដាក់បង្ហាញយានយន្តពីរកង់អគ្គិសនីរាប់សិបម៉ូដែល ត្រឹមឆ្នាំ 2030 ហើយកំពុងបន្តពង្រីកហេដ្ឋារចនាសម្ព័ន្ធដោះដូរអាគុយរបស់ខ្លួន។ នៅពេលដែលតម្លៃធ្លាក់ចុះ និងសមត្ថភាពកើនឡើង ហេតុផលសម្រាប់ការធ្វើអគ្គិសនីកម្មលើ ឈ្មោះម៉ាកល្បីៗពីដើមនឹងកាន់តែរឹងមាំ។ Super Cub គឺជានិមិត្តរូបដែលមិនអាចរំលង បានរហូតនោះទេ ហើយវាហាក់ដូចជាគ្រាន់តែជាបញ្ហានៃពេលវេលាប៉ុណ្ណោះ មុនពេលដែល យើងទទួលបានម៉ូតូ Honda Super Cub អគ្គិសនីពិតប្រាកដ។

ប៉ុន្តែសម្រាប់ពេលនេះ Super Cub អគ្គិសនី នៅតែជាក្ដីសុបិនជាងការពិតនៅក្នុងហាងលក់។ Honda ច្បាស់ណាស់ថាកំពុងរៀបចំគ្រឿងបង្គុំនីមួយៗ គ្រាន់តែមិនទាន់បានផ្គុំពួកវា ឱ្យទៅជាម៉ូតូដែលយើងជាច្រើននាក់កំពុងរង់ចាំនៅឡើយ៕