2026 Kawasaki W230

          ក្រុមហ៊ុន Kawasaki បាននាំចូលទីផ្សារប្រភេទម៉ូតូ Retro (បែបបុរាណ) ទំហំតូច ជាមួយនឹងម៉ូដែលថ្មីគឺ W230  ដែលត្រូវបានកំណត់សម្រាប់ការនាំចេញទៅលក់នៅ​ចក្រភពអង់គ្លេសនៅ​ដើមឆ្នាំ 2026។

ម៉ូតូ W230​​បានមកដល់ចក្រភពអង់គ្លេសថ្មីៗនេះ​​​​បន្ទាប់ពីមានការរីកដុះដាលនៅក្នុងផ្នែក​ទីផ្សារវិស័យ​ម៉ូតូមួយចំនួនដែលមាន​​​ទំហំ ក្រោម 500cc ដូចជា Honda's GB350S ដែល មានប្រជាប្រិយភាព​បំផុត។ ម៉ូដែលថ្មីឆ្នាំ 2026 របស់ក្រុមហ៊ុន Kawasaki នេះ គឺផ្អែកលើលំនាំ​មួយរបស់ម៉ូដែល 650-W1 ដែលមានទំហំធំ​ជាង ដែលត្រូវបានដាក់ឱ្យ​ដំណើរការដំបូង​នៅក្នុងឆ្នាំ 1965។

ម៉ូតូ W230 នឹងបង្ហាញខ្លួនជាសាធារណៈជាលើកដំបូងនៅចក្រភពអង់គ្លេសក្នុងព្រឹត្តិការណ៍ MCL25 ហើយនឹងដាក់តាំងបង្ហាញនៅក្នុងព្រឹត្តិការណ៍នេះរហូតដល់ថ្ងៃទី 24 ខែវិច្ឆិកា 2025 នៅ NEC ក្នុងទីក្រុង Birmingham។ វាត្រូវបានកំណត់ថា នឹងមានការចែកចាយ ក្នុងហាងឆាប់ៗចាប់​ពីខែមករា ឆ្នាំ 2026 នេះទៅក្នុងតម្លៃ 6​ ពាន់ដុល្លាជាង។

ម៉ូតូនេះប្រើប្រាស់ម៉ាស៊ីនស៊ីឡាំងតែមួយ ចាក់ប្រេងឥន្ធនៈ (Fuel-injected) ទំហំកម្លាំង 233cc ដែលផលិតកម្លាំង  17.3bhp @ 7,000rpm និងកម្លាំងបង្វិល 18N.m @ 5800rpm ។​ដើម្បីរក្សា រូបរាងលំនាំដើមអោយដូចនិងម៉ូដែល 650-W1 ម៉ូដែល W230 ថ្មីនេះបានទទួល​យកនូវ​រូបរាងលក្ខណ:ខាងក្រៅសាមញ្ញស្រាល កម្ពស់កៅអីទាប កម្លាំងងាយស្រួល ដែល ការរចនាផ្តោតទៅក្នុងយុគសម័យ​ទស្សវត្តទី 60s ផ្តល់ភាពស្រស់ស្រាយទៅអោយអ្នកជិះកាន់​តែច្រើន​ជាងពេលណាៗទាំងអស់ នេះបើយោងតាម​អ្នកនាំ​ពាក្យ​ក្រុមហ៊ុន Kawasaki UK។

2026 Kawasaki W230

សម្រាប់ប្រព័ន្ធហ្វ្រាំង គឺប្រភេទហ្វ្រាំងឌីសតែមួយទំហំ 265mm​​ បំពាក់ជាមួយកាលីព័រស៊ីឡាំង​ពីរ​នៅផ្នែកខាងមុខ។ នៅផ្នែកខាងក្រោយ គឺមានឌីសតែមួយទំហំ 220mm និងកាលីព័រស៊ីឡាំង តែមួយ។

ការដំឡើងប្រព័ន្ធជើងក្រោម (Suspension setup) រួមមានដងបូម Telescopic forks ទំហំ37mm នៅផ្នែកខាងមុខ និងបូម រ៉ឺស័រភ្លោះ (twin shocks)នៅផ្នែកខាងក្រោយជាមួយ adjustable preload។

កៅអីត្រូវបានកំណត់កម្ពស់745mm ជាមួយនឹងទម្ងន់ប៉ាន់ស្មានប្រហែល133kg ។ ម៉ូដែល W230​​មានកម្ពស់​ពីដីមកដល់បាតក្រោម​​150mm (Ground clearance) និងចំណុះធុងសាំងអាចផ្ទុកចំណុះបាន​ 12 លីត្រ៕