ប៉ុន្មានខែបន្ទាប់ពីរូបភាពត្រូវបានលេចធ្លាយតាមរយៈឯកសារចុះបញ្ជីប្រភេទ ពេលនេះក្រុមហ៊ុន KTM បានដាក់សម្ពោធជាផ្លូវការនូវម៉ូតូស្ព័រម៉ាស៊ីនពីរស៊ីឡាំងជួរថ្មី 450 RC ប៉ុន្តែរហូតមកដល់ពេលនេះ វាមានលក់តែនៅក្នុងទីផ្សារប្រទេសចិនប៉ុណ្ណោះ។

ម៉ូតូនេះត្រូវបានគេឃើញកំពុងជិះសាកល្បងកាលពីខែសីហាឆ្នាំមុន ដែលតាមពិតទៅវាគឺជាកំណែរចនារូបរាងថ្មីរបស់ម៉ូដែល CFMoto 450SR-S (ដែលជាកំណែខ្ពស់របស់ 450SS) ដោយមានបំពាក់នូវដៃយោលម្ខាង (Single-sided swingarm)។ ទោះជាយ៉ាងណាក៏ដោយ កំណែរបស់ KTM មិនត្រឹមតែមានសំបកតួថ្មីប៉ុណ្ណោះទេ វាក៏មានកម្លាំងខ្លាំងជាង និងជុំម៉ាស៊ីនខ្ពស់ជាង CFMoto ផងដែរ ព្រមទាំងទទួលបានប្រព័ន្ធបូម និងហ្វ្រាំងថ្មីស្រឡាង។

Is the 450 RC a prelude of what we can expect for a twin-cylinder KTM sportbike for the global market?KTM

ការរចនា និងរូបរាង

450 RC មានរូបរាងស្រដៀងនឹងម៉ូដែលធំ 990 RC R ដែលជាម៉ូតូម៉ាស៊ីនឌុបខ្នាតកណ្តាលរបស់ក្រុមហ៊ុន Mattighofen។ ការរចនាមានបំពាក់ភ្លើងមុខចំកណ្តាល អមដោយស្លាបសងខាង (Winglets) នៅផ្នែកខាងមុខនៃរបាំងខ្យល់ ដែលស៊ីគ្នាជាមួយបន្ទះសំបកតួចំហៀងដោយគ្មានឃើញក្បាលខ្ចៅឡើយ។ វាជារូបរាងដ៏លេចធ្លោដែលសក្ដិសមជា "KTM" ពិតប្រាកដ ជាពិសេសនៅពេលវាមានពណ៌ទឹកក្រូចដែលជាពណ៌តំណាងប្រេន។

គ្រឿងបង្គុំ និងសមត្ថភាពម៉ាស៊ីន

នៅក្រោមសំបកតួ វាប្រើប្រាស់គ្រោងឆ្អឹងដែកទុយោ (Tubular steel frame) ដូចទៅនឹង CFMoto 450SS ប៉ុន្តែប្រើប្រាស់ម៉ាស៊ីនពីរស៊ីឡាំងជួរ 450cc ដែលត្រូវបានកែសម្រួល៖

• កម្លាំងសេះ: KTM ផលិតបាន 55 សេះ នៅកម្រិត 10,000 ជុំក្នុងមួយនាទី (ខ្លាំងជាង CFMoto ដែលមានកម្លាំង 51 សេះ)។
• កម្លាំងបង្វិល: ម៉ូតូទាំងពីរផលិតបាន 40N.m ដូចគ្នា ប៉ុន្តែ KTM សម្រេចកម្លាំងនេះនៅកម្រិត 8,000 ជុំក្នុងមួយនាទី។
• ទម្ងន់: KTM មានទម្ងន់សរុបត្រឹមតែ 168 គីឡូក្រាម  ដែលស្រាលជាង CFMoto 450SS ចំនួន 2.20kg។

The 450 RC uses a TFT dash.KTM

ប្រព័ន្ធបូម ហ្វ្រាំង និងបច្ចេកវិទ្យា

• ប្រព័ន្ធបូម: ប្រើប្រាស់ប្រេនក្នុងស្រុក WP ដែលមានបូមមុខ Apex 43 មីលីម៉ែត្រ (អាចសារ៉េបានទាំងសងខាង) និងបូមក្រោយដែលអាចសារ៉េកម្រិតយារ និងកម្រិតយឺតបាន។
• ប្រព័ន្ធហ្វ្រាំង: នេះជាម៉ូដែលដំបូងគេដែលប្រើគ្រឿងបង្គុំហ្វ្រាំងដែលអភិវឌ្ឍដោយ WP ដោយមានកាលីព័រ 4 ពីស្តុង និងថាសហ្វ្រាំង 320 មីលីម៉ែត្រនៅខាងមុខ។
• ប្រព័ន្ធអេឡិចត្រូនិក: មានប្រព័ន្ធ Cornering ABS ដែលវៃឆ្លាត (អាចបិទ ABS ក្រោយបានក្នុងរបៀប "Supermoto"), ប្រព័ន្ធ Traction Control, Cruise Control, កម្តៅដៃចង្កូត និងរបៀបបើកបរចំនួន 4 (Street, Rain, Sport និង Track)។

Is the twin-cylinder 450 the motorcycle you always wanted the RC 390 to be?KTM

តម្លៃ និងទីផ្សារអនាគត

នៅក្នុងប្រទេសចិន 450 RC ត្រូវបានដាក់លក់ក្នុងតម្លៃប្រហាក់ប្រហែល 5,100 ដុល្លារ ដែលថ្លៃជាង CFMoto 450SR-S ប្រហែល 1,000 ដុល្លារ។

ទោះបីជាទីផ្សារម៉ូតូកម្លាំង 400-500cc កំពុងរីកដុះដាលខ្លាំងក៏ដោយ ប៉ុន្តែគេនៅមិនទាន់ដឹងច្បាស់ថា តើ KTM នឹងនាំយកម៉ូដែលនេះចេញទៅលក់ក្រៅប្រទេសចិនឬយ៉ាងណា។ បច្ចុប្បន្ន KTM កំពុងអភិវឌ្ឍម៉ាស៊ីនក្រោម 500cc ផ្ទាល់ខ្លួនរបស់ពួកគេ (ទំនងជាសម្រាប់ម៉ូដែល 490 Adventure)។ ម្យ៉ាងទៀត ការដែលម៉ូតូនេះប្រើឈ្មោះ "450" ក៏អាចបញ្ជាក់ថាវាសម្រាប់តែទីផ្សារចិនប៉ុណ្ណោះ ព្រោះជាទូទៅម៉ូតូផ្លូវរាបរបស់ KTM តែងតែប្រើលេខបញ្ចប់ដោយ "90" (ដូចជា 390 ឬ 790)។ ដូច្នេះ ម៉ូតូស្ព័រសម្រាប់ទីផ្សារអន្តរជាតិ អាចនឹងចេញមកក្នុងរូបរាងខុសគ្នា ក្រោមឈ្មោះ "490 RC" វិញ។