ក្រុមហ៊ុន Leapmotor បានដាក់បង្ហាញម៉ូដែលថ្មីមួយក្នុងអំឡុងពេលប្រារព្ធខួប 10 ឆ្នាំរបស់ខ្លួន និងបានប្រកាសពីកាលបរិច្ឆេទដាក់លក់ជាផ្លូវការសម្រាប់រថយន្ត SUV ម៉ូដែល D19។ ក្រុមហ៊ុនផលិតយានយន្តថាមពលថ្មី (NEV) របស់ចិនមួយនេះ នៅថ្ងៃនេះបានដាក់ បង្ហាញរថយន្ត D99 MPV ដែលជាម៉ូដែល MPV ដំបូងបង្អស់របស់ខ្លួន។

រថយន្ត D99 MPV ដែលជាម៉ូដែលទីពីរនៅក្នុងស៊េរី D របស់ Leapmotor មានប្រវែងបណ្តោយ លើសពី 5.2 ម៉ែត្រ, ទទឹងជិត 2 ម៉ែត្រ និងមានគម្លាតកង់មុខទៅក្រោយប្រវែងលើសពី 3.1 ម៉ែត្រ។ រថយន្ត MPV នេះនឹងមានផ្តល់ជូនជាប្រភេទរថយន្តអគ្គិសនីបើកបរបានរយៈចម្ងាយ ឆ្ងាយ​ (EREV) និងរថយន្តអគ្គិសនីប្រើអាគុយសុទ្ធ (BEV) ដូចទៅនឹងម៉ូដែលផ្សេងទៀតរបស់ Leapmotor ដែរ។

Leapmotor MPV D99

·       D99 EREV: បំពាក់កញ្ចប់អាគុយទំហំ 80.3 kWh ដែល Leapmotor ថ្លែងថាជាប្រភេទរថយន្ត MPV ដែលអាចពង្រីកចម្ងាយការ បើកបរដោយប្រើតែអាគុយសុទ្ធបានឆ្ងាយជាងគេបំផុតក្នុងពិភពលោក។

·       D99 BEV: នឹងត្រូវបំពាក់មកជាមួយប្រព័ន្ធអគ្គិសនីកម្រិតវ៉ុលខ្ពស់គឺ 1000 វ៉ុល និងបំពាក់មកជាមួយអាគុយទំហំ 115 kWh ពីក្រុមហ៊ុន CATL ។

រថយន្ត D99 ប្រើប្រាស់បន្ទះឈីប Qualcomm Snapdragon 8797 ចំនួនពីរ ដើម្បីផ្គត់ផ្គង់ប្រព័ន្ធបើកបរឆ្លាតវៃ ដែលផ្តល់កម្លាំងគណនាដល់ទៅ 1280 TOPS និង VLA (Visual-Language-Action)។ រថយន្ត MPV នេះតួខ្លួនមានភាពរឹងមាំ 46,682 Nm/deg និងរួមបញ្ចូលនូវបច្ចេកវិទ្យារក្សាលំនឹងពេលបែកកង់។

Leapmotor SUV D19

ជួរម៉ូដែលរថយន្តពេលបច្ចុប្បន្នរបស់ Leapmotor ដែលកំពុងលក់ក្នុងប្រទេសចិនរួ​មមាន​ម៉ូដែល T03, B10, B01, C01, C10, C11, C16 និង Lafa 5។ នៅក្នុងព្រឹត្តិការណ៍ថ្ងៃនេះ ក្រុមហ៊ុនក៏បានប្រកាសថា រថយន្ត SUV ម៉ូដែល D19 នឹងត្រូវដាក់លក់ជាផ្លូវការ និងចាប់ផ្តើមចែកចាយនៅខែមេសា ឆ្នាំ 2026។

Leapmotor បានបង្ហាញរូបរាង D19 កាលពីថ្ងៃទី 16 ខែតុលា ដែលជាម៉ូដែលដំបូងក្នុងស៊េរី D ដោយផ្តល់ជូនទាំងប្រភេទ EREV និង BEV៖

·       D19 BEV: បំពាក់អាគុយ 115 kWh អាចបើកបរបានចម្ងាយរហូតដល់ 720 គីឡូម៉ែត្រ។

·       D19 EREV: ប្រើប្រាស់អាគុយទំហំ 80.3 kWh ដែលជាអាគុយធំបំផុតមិនធ្លាប់មានសម្រាប់ប្រភេទ EREV ក្នុងទីផ្សារចិន ដោយអាចបើកបរបានចម្ងាយរហូតដល់ 500 គីឡូម៉ែត្រ។

ក្រុមហ៊ុនបានបញ្ជាក់នាថ្ងៃនេះថា D19 នឹងមានជម្រើសកៅអីចំនួន 6 កៅអី និង 7​​ កៅ អី៕