នៅពេលដែលម៉ាកយីហោ Lexus ត្រូវបានដាក់សម្ពោធដំបូងក្នុងឆ្នាំ 1989 ក្រុមហ៊ុនបានផ្តល់ជូននូវរថយន្តប្រភេទ Sedan ចំនួនពីរម៉ូដែល គឺ ES និង LS។ រថយន្តលំដាប់កំពូលខ្នាតធំ (full-size) ម៉ូដែល LS បានក្លាយជាអ្នកកំណត់អត្តសញ្ញាណ និងកិត្យានុភាពរបស់ Lexus យ៉ាងឆាប់រហ័ស ប៉ុន្តែ 37 ឆ្នាំក្រោយមក គឺមានតែស្រឡាយរថយន្តខ្នាតមធ្យម (mid-size) ម៉ូដែល ES ប៉ុណ្ណោះដែលនៅតែបន្តឈរជើងយ៉ាងរឹងមាំ។ បច្ចុប្បន្ន Lexus កំពុងត្រលប់ទៅរកការមានរថយន្ត Sedan តែពីរម៉ូដែលម្តងទៀត ហើយ LS នឹងមិនស្ថិតក្នុងចំណោមនោះឡើយ ដោយសារវាត្រូវបានលាឈប់ពីទីផ្សារជាមួយការផលិតកំណែទម្រង់ចុងក្រោយ Heritage Edition ត្រឹមតែ 250 គ្រឿងប៉ុណ្ណោះសម្រាប់ឆ្នាំ 2026។ ចំណែកឯម៉ូដែលខ្នាតតូច IS គឺនៅតែមានវត្តមាន ប៉ុន្តែវាហាក់ដូចជាចាប់ផ្តើមចាស់វស្សាបន្តិចទៅហើយ ដោយសារតែជំនាន់ទីបីរបស់វាទើបតែទទួលបានការកែទម្រង់មុខមាត់ (facelift) ជាលើកទីបី។

ដើម្បីជាសក្ខីភាពសញ្ជាក់ពីការបង្កើនសារៈសំខាន់របស់ខ្លួន រថយន្ត ES ទទួលបានការផ្លាស់ប្តូរទម្រង់រចនា និងបច្ចេកវិទ្យាយ៉ាងស៊ីជម្រៅ (comprehensive overhaul) ដែលឆ្លុះបញ្ចាំងពីតួនាទីដ៏ធំជាងមុនដែលខ្លួនត្រូវទទួលខុសត្រូវនៅក្នុងជួរផលិតផលរបស់ Lexus។ នៅក្នុងអត្ថបទនេះ យើងនឹងផ្តោតជាសំខាន់លើកំណែទម្រង់អគ្គិសនី (EV) ថ្មីរបស់ ES (ខណៈវាក៏មានកំណែទម្រង់ប្រភេទ Hybrid ផងដែរ ដែលយើងនឹងធ្វើការវាយតម្លៃដោយឡែក)។ រថយន្ត ES ជំនាន់ទីប្រាំបីនេះ — ជាពិសេសគឺប្រភេទ EV — តំណាងឱ្យការផ្លាស់ប្តូរដ៏មានឥទ្ធិពលបំផុតសម្រាប់ម៉ូដែលនេះ ចាប់តាំងពីការចាប់ផ្តើមដំបូងរបស់ខ្លួនកាលពីជាងបីទសវត្សរ៍មុន។ វាមិនត្រឹមតែផ្តល់នូវទម្រង់ប្រព័ន្ធថាមពលថ្មីនេះប៉ុណ្ណោះទេ ប៉ុន្តែវាក៏មានទំហំធំជាងមុន និងព្យាយាមចាប់យកកាតព្វកិច្ចមួយចំនួនពីឡានលំដាប់កំពូល LS មកជាមួយផងដែរ តាមរយៈជម្រើសបរិក្ខារលំដាប់ខ្ពស់ថ្មីៗ ដែលមានផ្តល់ជូនផ្តាច់មុខតែលើម៉ូដែលអគ្គិសនី។

នៅពេលដំបូង អ្នកប្រហែលជាមិនអាចចំណាំបានទេថារថយន្ត EV នេះគឺជារថយន្ត ES។ វាមានផ្នែកខាងមុខទម្រង់ស្មើរាបស្មើ ដោយមានត្រឹមតែខ្សែបន្ទាត់រាងប៉ាណាទ្រង់ទ្រាយនាឡិកាខ្សាច់ (spindle grille) ព្រាលៗ ដែលធ្លាប់មាននៅលើរថយន្តប្រើសាំងជាច្រើនរបស់ Lexus។ ខ្សែបន្ទូលដំបូលទម្លាក់ទៅខាងក្រោយយ៉ាងស្រទន់ ប៉ុន្តែជាមួយនឹងកម្ពស់ 1559mm ឡាននេះមានកម្ពស់ខ្ពស់ជាងមុនដល់ទៅ 114mm ហើយថែមទាំងខ្ពស់ជាងម៉ូដែល UX បន្តិចផងដែរ ដែល UX ត្រូវបានគេចាត់ទុកជាប្រភេទរថយន្ត SUV ទៅហើយនោះ។

ជាមួយនឹងប្រវែងចន្លោះកង់មុខក្រោយ (wheelbase) វែងជាងមុន 78.74mm ឥឡូវនេះ ES ផ្តល់នូវលំហរធំទូលាយអាចលាតសន្ធឹងជើងបានយ៉ាងមានផាសុកភាពនៅកៅអីជួរក្រោយ។ វាក៏មានជម្រើសពិសេសនៅលើម៉ូដែលបើកបរដោយកង់មុខ (front-drive) សម្រាប់វគ្គតុបតែង Luxury គឺកញ្ចប់កៅអីជួរក្រោយកម្រិតនាយកប្រតិបត្តិ (Executive rear-seat package) ដែលមានជើងទម្រ (ottoman) សម្រាប់អ្នកដំណើរខាងមុខ និងសមត្ថភាពសារ៉េដោយអគ្គិសនី រួមទាំងប្រព័ន្ធកម្តៅ និងប្រព័ន្ធខ្យល់បក់សម្រួលសម្រាប់កៅអីជួរក្រោយទាំងសងខាង។ Lexus ថែមទាំងបានបញ្ចូលនូវរបៀបបើកបរពិសេស (special drive mode) មួយ សម្រាប់ប្រើប្រាស់នៅពេលដែលកៅអីលំដាប់ប្រណីតនោះកំពុងត្រូវបានដំណើរការ ដែលរបៀបនេះត្រូវបានបង្កើតឡើងដើម្បីជៀសវាងភាពរអាក់រអួល ឬការកន្ត្រាក់ពីប្រព័ន្ធហ្វ្រាំងបង្កើតថាមពលឡើងវិញ (regenerative braking) ដែលមនុស្សជាច្រើនធ្លាប់បានជួបប្រទះពេលជិះនៅកៅអីក្រោយនៃរថយន្ត Uber ប្រភេទអគ្គិសនី។

រថយន្ត ES EV មកជាមួយជម្រើសកម្លាំងពីរប្រភេទ៖ ម៉ូដែល ES350e បើកបរដោយកង់មុខ កម្លាំង 224 សេះ និងម៉ូដែល ES500e បើកបរវិលពេញកង់ (AWD) កម្លាំង 338 សេះ។ ម៉ូដែលទាំងពីរមិនមានល្បឿនលឿនខ្លាំងអស្ចារ្យបើធៀបនឹងស្តង់ដាររថយន្ត EV នោះទេ ដោយយើងប៉ាន់ប្រមាណថាសូម្បីតែម៉ូដែលប្រើម៉ូទ័រឌុប (ES500e) នឹងប្រើពេល 4.8 វិនាទី ដើម្បីស្ទុះពី 0ដល់ 96​គីឡូម៉ែត្រ/ម៉ោង។ កម្លាំងរបស់វាមិនបោកបែនអ្នកឱ្យផ្អែកទៅក្រោយខ្លាំងនោះទេ ប៉ុន្តែវាគឺសាកសមល្អណាស់សម្រាប់រថយន្ត Sedan បែបធូរស្រាលមិនមែនស្ព័រដូចជា ES នេះ។ វាមានកម្រិតកែសម្រួលប្រព័ន្ធហ្វ្រាំងបង្កើតថាមពលឡើងវិញចំនួន 5 កម្រិត ប៉ុន្តែមិនមានជម្រើសបើកបរដោយប្រើឈ្នាន់មួយ (one-pedal driving) ដូចដែលអ្នកបើកបរ EV ជាច្រើនរំពឹងទុកនោះឡើយ។ Lexus បានបញ្ជាក់ថា ខ្លួនចង់ឱ្យអ្នកបើកបរជាអ្នកគ្រប់គ្រងលើការបញ្ជាហ្វ្រាំងដើម្បីបញ្ឈប់យានយន្តដោយផ្ទាល់។

ម៉ូដែល ES500e ផ្តល់អារម្មណ៍ហាក់ដូចជាមានទម្ងន់ធ្ងន់នៅពេលបត់ជ្រុង — ដោយ Lexus ប៉ាន់ប្រមាណថាទម្ងន់ឡានទទេ (curb weight) គឺជិត 2,260 គីឡូក្រាម) សម្រាប់កំណែទម្រង់ option ពេញ — ហើយការបើកបរមានភាពរលាក់យោលជាងអ្វីដែលយើងបានរកឃើញនៅលើម៉ូដែល Hybrid ដែលមានទម្ងន់ស្រាលជាងជិត 453kg ទោះជាយ៉ាងណាក៏ដោយ រថយន្ត ES ប្រភេទអគ្គិសនីនេះ នៅតែបន្តផ្តោតលើភាពសុខស្រួលជាចម្បង និងមានភាពស្ងប់ស្ងាត់នៅក្នុងកាប៊ីនយ៉ាងគួរឱ្យចាប់អារម្មណ៍។

កញ្ចប់អាគុយទំហំ 67 kWh គឺជាជម្រើសតែមួយគត់សម្រាប់ទាំងប្រភេទម៉ូទ័រទោល និងម៉ូទ័រឌុប ដែលទំហំសមត្ថភាពនេះគឺមិនសូវធំប៉ុន្មានទេសម្រាប់រថយន្តដែលមានខ្នាតធំ និងទម្ងន់ធ្ងន់បែបនេះ។ ការប៉ាន់ប្រមាណចម្ងាយបើកបរគឺចាប់ពី 437 គីឡូម៉ែត្រ សម្រាប់ម៉ូដែល ES500e ដែលប្រើយ៉ាន់កង់ធំ ដែលបើកបរបានរហូតដល់ 494 គីឡូម៉ែត្រ សម្រាប់ម៉ូដែល ES350e ដែលប្រើយ៉ាន់កង់តូចជាង។ តួលេខទាំងនេះមិនសូវជាលេចធ្លោខ្លាំងនោះទេក្នុងចំណោមរថយន្ត Sedan អគ្គិសនីនាពេលបច្ចុប្បន្ន ហើយសូម្បីតែកម្រិតល្បឿននៃការសាកថ្មរហ័ស DC អតិបរមា 150 kW ក៏ដូចគ្នាដែរ។ បច្ចេកវិទ្យា EV របស់ Toyota (ក្រុមហ៊ុនមេរបស់ Lexus) នៅតែមានផ្លូវត្រូវដើរវែងឆ្ងាយទៀត ដើម្បីដេញទាន់ក្រុមហ៊ុនដឹកនាំឈានមុខក្នុងឧស្សាហកម្មលើសមរភូមិមួយនេះ។

ទោះជាយ៉ាងណាក៏ដោយ រថយន្ត ES EV បានផ្តល់នូវកម្រិតតម្លៃដ៏ទាក់ទាញ និងគួរឱ្យភ្ញាក់ផ្អើល ដែលចំណុចនេះបានជួយប៉ះប៉ូវដល់កង្វះខាតខាងលើមួយចំនួនបានយ៉ាងល្អ។ ជាមួយនឹងម៉ូដែល ES350e ដែលមានតម្លៃចាប់ផ្តើមពី 48,895 ដុល្លារ វាមានតម្លៃប្រហាក់ប្រហែលនឹង Tesla Model 3 ប៉ុន្តែវាផ្តល់នូវលំហរខាងក្នុងធំទូលាយជាង, ផ្នែកខាងក្នុងមានភាពប្រណីតជាងឆ្ងាយ និងមានមុខងារស្តង់ដារជាច្រើន។ តម្លៃរបស់ ES350e អាចឡើងលើសពី 60,000 ដុល្លារ ប្រសិនបើបំពាក់កញ្ចប់ Executive package ខណៈម៉ូដែលដែលមានកម្លាំងខ្លាំងជាង ES500e មានតម្លៃចន្លោះពី 51,895 ដុល្លារ ដល់ 60,295 ដុល្លារ។ ប៉ុន្តែទោះជាស្ថិតក្នុងកម្រិតទឹកប្រាក់ទាំងនេះក៏ដោយ វានៅតែជាតម្លៃមួយដ៏សមរម្យ និងចំណេញខ្លាំងសម្រាប់ ES ដោយផ្អែកលើទំហំរបស់វា, គុណភាពសម្ភារៈតុបតែងកាប៊ីនលំដាប់ខ្ពស់ និងភាពផ្ចិតផ្ចង់សរុបនៃរថយន្តទាំងមូល។