​​​​​​​          ក្រុមហ៊ុន Nissan បានដាក់សម្ពោធរថយន្ត SUV ម៉ូដែល NX8 របស់ខ្លួនជាផ្លូវការនៅក្នុងប្រទេសចិន ដោយក្នុងនោះក្រុមហ៊ុនបានប្រកាសថា ទទួលបានការបញ្ជាទិញរហូតដល់ 8,423 គ្រឿង ក្នុងរយៈពេលត្រឹមតែ 30 នាទីដំបូងនៃការលក់។ ម៉ូដែលនេះត្រូវបានដាក់លក់ក្នុងជម្រើសពីរគឺ ប្រភេទអគ្គិសនីសុទ្ធ (BEV) និងប្រភេទប្រើម៉ាស៊ីនសាំងជំនួយ (Range-extended) ជាមួយតម្លៃពិសេសចាប់ផ្តើមពី 20,700 ដុល្លារអាមេរិក ។

ការពង្រឹងវត្តមានក្នុងទីផ្សាររថយន្តថាមពលថ្មី (NEV)

NX8 គឺជាការជំរុញចុងក្រោយបង្អស់របស់ Nissan ចូលទៅក្នុងទីផ្សារ SUV ថាមពលថ្មីដ៏ប្រកួតប្រជែងរបស់ចិន។ វាត្រូវបានបង្កើតឡើងនៅលើស្ថាបត្យកម្ម Tianyan Architecture 2.0 និងប្រើប្រាស់ platform 800V silicon carbide សម្រាប់ជម្រើសទាំងពីរ ដែលអនុញ្ញាតឱ្យមានការសាកថ្មបានលឿនបំផុត និងបង្កើនប្រសិទ្ធភាពថាមពល។

យុទ្ធសាស្ត្រថាមពលទ្វេ (Dual Power Strategy)

Nissan ផ្តល់ជូន NX8 នូវជម្រើសថាមពលអគ្គិសនីពីរប្រភេទខុសគ្នា៖

1. ប្រភេទអគ្គិសនីសុទ្ធ (BEV): ប្រើម៉ូទ័រទោលដែលមានកម្លាំង 215 គីឡូវ៉ាត់ ឬ 250គីឡូវ៉ាត់ ជាមួយអាគុយទំហំរហូតដល់ 81 គីឡូវ៉ាត់ម៉ោង (kWh)។ វាអាចរត់បានចម្ងាយ 650 គីឡូម៉ែត្រ (CLTC)។ ចំណុចលេចធ្លោគឺការសាកថ្មលឿន ដែលអាចសាកពី 10% ទៅ 80% ក្នុងរយៈពេលតែ 12 នាទី ប៉ុណ្ណោះ។
2. ប្រភេទប្រើម៉ាស៊ីនសាំងជំនួយ (EREV): ប្រើម៉ាស៊ីន 1.5T ផ្គួបជាមួយម៉ូទ័រអគ្គិសនីកម្លាំង 250 គីឡូវ៉ាត់។ វាអាចបើកបរដោយអគ្គិសនីសុទ្ធបាន 310 គីឡូម៉ែត្រ និងមានចម្ងាយបើកបររួមគ្នាសរុបរហូតដល់ 1,450 គីឡូម៉ែត្រ។ កម្រិតស៊ីសាំងនៅពេលអស់ថ្មគឺត្រឹមតែ 4.51 លីត្រ/100 គីឡូម៉ែត្រ។

បច្ចេកវិទ្យាបើកបរឆ្លាតវៃ

NX8 រួមបញ្ចូលសេនស័រចាប់សញ្ញាកម្រិតខ្ពស់ចំនួន 29 គ្រាប់ រួមទាំង LiDAR ផងដែរ ដែលគាំទ្រមុខងារជំនួយការបើកបរទំនើបៗដូចជា ការបើកបរស្វ័យប្រវត្តិលើផ្លូវហាយវ៉េ និងក្នុងក្រុង (NOA) ព្រមទាំងប្រព័ន្ធចូលចតដោយស្វ័យប្រវត្តិ។ ប្រព័ន្ធនេះដំណើរការដោយបច្ចេកវិទ្យារបស់ក្រុមហ៊ុន Momenta។

បច្ចេកវិទ្យាក្នុងកាប៊ីន

ផ្នែកខាងក្នុងនៃ NX8 បំពាក់នូវបច្ចេកវិទ្យាទំនើបៗរួមមាន៖

• អេក្រង់ភ្លោះទំហំ 15.6 អ៊ីញ និងអេក្រង់កុងទ័រ 10.25 អ៊ីញ។
• អេក្រង់បញ្ចាំងលើកញ្ចក់មុខ (AR HUD) ទំហំធំដល់ទៅ 63 អ៊ីញ។
• ដំណើរការដោយបន្ទះឈីប Qualcomm 8295P និងប្រព័ន្ធប្រតិបត្តិការ Nissan OS 2.0។
• ប្រព័ន្ធសំឡេងមានឧបករណ៍បំពងសរុប 25 គ្រាប់ (កម្លាំង 2000 វ៉ាត់)។
• មានធុងទឹកកក/កម្តៅចំណុះ 6.33 លីត្រ និងប្រព័ន្ធបញ្ជាដោយសំឡេង AI សម្រាប់តំបន់ទាំង 4 ក្នុងឡាន។

គោលដៅទីផ្សារ

ជាមួយប្រវែងចន្លោះកង់មុខក្រោយ (wheelbase) 2,917mm NX8 ស្ថិតនៅចន្លោះផ្នែក SUV ខ្នាតកណ្តាល និងខ្នាតធំ។ តម្លៃរបស់វាធ្វើឱ្យវាក្លាយជាគូប្រជែងផ្ទាល់ជាមួយម៉ូដែលល្បីៗដូចជា Li Auto L6, Aito M6 និងរថយន្ត SUV ស្រឡាយ G របស់ Xpeng៕