មានតម្រុយ និងភស្តុតាងកាន់តែច្រើនឡើងដែលបង្ហាញថា ក្រុមហ៊ុន Suzuki រៀបនឹងដាក់បង្ហាញម៉ូតូស្ព័រថ្នាក់ដំបូង (entry-level) ម៉ូឌែល GSX250R កំណែទម្រង់អាប់ដេតថ្មីយ៉ាងប្រកដ ដោយភ្ជាប់មកជាមួយស្លាបខ្យល់ (winglets) និងម៉ាស៊ីនពីរស៊ីឡាំងស្រប (parallel-twin) បំពាក់ប្រព័ន្ធកំណត់វេលាវ៉ាល់ប្រែប្រួល (variable valve timing)។

យើងធ្លាប់បានបញ្ចេញព័ត៌មានពីម៉ាស៊ីន VVT អាប់ដេតថ្មីនេះកាលពីឆ្នាំ 2024 នៅពេលដែល Suzuki បានដាក់ពាក្យស្នើសុំចុះប៉ាតង់។ នាពេលនេះ ឯកសារអនុម័តប្រភេទយានយន្តនៅក្នុងប្រទេសចិន (ជាកន្លែងដែល GSX250R ត្រូវបានផលិតឡើងតាមរយៈកិច្ចព្រមព្រៀងបោះទុនរួមគ្នាជាមួយម៉ាកយីហោចិន Haojue) បានបញ្ជាក់ថាវាត្រៀមខ្លួនរួចរាល់សម្រាប់ការដាក់លក់ហើយ។

ឯកសារអនុម័តថ្មីនេះ រួមមានរូបភាពដែលបង្ហាញពីការផ្លាស់ប្តូររូបរាងខាងក្រៅបន្តិចបន្តួច។ តួខ្លួន (bodywork) ភាគច្រើនគឺរក្សាទុកពីម៉ូឌែលបច្ចុប្បន្នដែលមានតាំងពីឆ្នាំ 2017 ប៉ុន្តែវាមានចង្កៀងមុខ និងកាងមុខថ្មី ព្រមទាំងការបន្ថែមស្លាបខ្យល់ (winglets) នៅកាងខាងចំហៀង។ ដើម្បីទុកកន្លែងសម្រាប់ស្លាបខ្យល់នេះ ភ្លើងស៊ីញ៉ូត្រូវបានផ្លាស់ប្តូរទីតាំងទៅលើផ្នែកកាងជ័រពណ៌ខ្មៅនៅពីមុខដៃចង្កូតវិញ។

ក្រៅពីនេះ ការផ្លាស់ប្តូរដែលគួរឱ្យកត់សម្គាល់បំផុតគឺ បំពង់ស៊ីម៉ាំងដែលបានរចនាឡើងវិញ ដែលជាសញ្ញាបញ្ជាក់ពីការផ្លាស់ប្តូរគ្រឿងបន្លាស់ខាងក្នុងនៃម៉ាស៊ីន និងផ្លាកសញ្ញាតូចមួយនៅលើគម្របហ្សង់មុខ (front sprocket cover) ដែលមានសរសេរអក្សរ “VVL” ដើម្បីបញ្ជាក់ពីប្រព័ន្ធលើកវ៉ាល់ប្រែប្រួល (variable valve lift) របស់ម៉ាស៊ីន។

កម្លាំង និងប្រព័ន្ធបច្ចេកវិទ្យា ឯកសារអនុម័តបានបញ្ជាក់ថា ទម្ងន់របស់ម៉ូតូគឺមិនមានការផ្លាស់ប្តូរឡើយ គឺនៅត្រឹម 178គីឡូក្រាម  ដដែល ប៉ុន្តែកម្លាំងរបស់វាបានកើនឡើងពី 25 សេះ លើម៉ូឌែលបច្ចុប្បន្ន ទៅ 29 សេះ។ វាអាចស្តាប់ទៅដូចជាការកើនឡើងបន្តិចបន្តួច ប៉ុន្តែប្រសិនបើពិនិត្យឱ្យស៊ីជម្រៅ វាគឺជាការកើនឡើងកម្លាំងរហូតដល់ទៅប្រហែល 17% ធៀបនឹងម៉ូឌែលចាស់។

ប៉ាតង់កាលពីឆ្នាំ 2024 បានបង្ហាញពីម៉ាស៊ីន SOHC 8 វ៉ាល់ ពីរស៊ីឡាំងស្របរបស់ GSX250R ជាមួយនឹងប្រព័ន្ធវ៉ាល់ប្រែប្រួល ដែលមិនខុសពីប្រព័ន្ធ VVA របស់ Yamaha ប៉ុន្មានឡើយ។ អ័ក្សកាំស៊ែរទោល (single camshaft) មានទម្រង់កាំ (cam lobe profiles) បឺតពីរខុសគ្នា ដែលនីមួយៗមានដងសង្កត់ (rocker arm) ផ្ទាល់ខ្លួន៖

ល្បឿនជុំទាប៖ នៅពេលជិះល្បឿនយឺត និងមួលហ្គាសតិច ដងសង្កត់ដែលដើរលើកាំកម្រិតទាប នឹងធ្វើសកម្មភាពលើវ៉ាល់បឺត។

ល្បឿនជុំខ្ពស់៖ នៅពេលត្រូវការសមត្ថភាពល្បឿនខ្លាំង សម្ពាធប្រេងនឹងរុញគន្លឹះដើម្បីភ្ជាប់ដងសង្កត់ទីពីរ (ដែលដើរលើកាំកម្រិតខ្ពស់ និងបើកយូរ) ទៅកាន់ដងសង្កត់ទីមួយ ដែលធ្វើឱ្យវ៉ាល់បឺតបើកបានទូលាយជាងមុន និងបើកបានយូរជាងមុន។

ទោះបីជា Suzuki មិនទាន់បានបញ្ជាក់ផ្លូវការថាប្រព័ន្ធនេះត្រូវបានប្រើនៅលើ GSX250R ខាងមុខនេះក៏ដោយ ប៉ុន្តែផ្លាកសញ្ញា "VVL" និងពេលវេលានៃការដាក់ពាក្យសុំប៉ាតង់ក្នុងឆ្នាំ 2024 គឺជាប្រភពដ៏សមហេតុផលបំផុតនៃការកើនឡើងកម្លាំងរបស់ gixxer តូចមួយនេះ។

ការរំពឹងទុកលើទីផ្សារអឺរ៉ុប សមត្ថភាពល្បឿនមិនមែនជាហេតុផលតែមួយគត់ក្នុងការបំពាក់ប្រព័ន្ធ variable valve timing នោះទេ ព្រោះវាក៏អាចជួយកាត់បន្ថយការបញ្ចេញផ្សែងពុលផងដែរ ដែលនេះប្រហែលជាកត្តាសំខាន់បំផុតសម្រាប់ Suzuki។

ខណៈដែលម៉ូឌែល GSX250R បច្ចុប្បន្ននៅតែមានលក់នៅក្នុងសហរដ្ឋអាមេរិក និងទីផ្សារអាស៊ី វាត្រូវបានដកចេញពីទីផ្សារអឺរ៉ុបកាលពីឆ្នាំ 2021 នៅពេលដែលបទដ្ឋានបំភាយផ្សែង Euro 5 ដ៏តឹងរ៉ឹងត្រូវបានដាក់ឱ្យប្រើប្រាស់។ នាពេលនេះ តំបន់អឺរ៉ុបកំពុងប្រើប្រាស់បទដ្ឋាន Euro 5+ ដែលកាន់តែតឹងរ៉ឹងជាងមុន ប៉ុន្តែប្រព័ន្ធ VVL ថ្មីនេះអាចនឹងជួយឱ្យ GSX250R ឆ្លងផុតការកំណត់នេះបាន។ វាធ្លាប់មានប្រវត្តិនៃការធ្វើបែបនេះរួចមកហើយ ដោយ Suzuki ធ្លាប់បានដកម៉ូឌែល GSX-R1000 ចេញពីអឺរ៉ុបក្នុងឆ្នាំ 2021 ដោយរំលងបទដ្ឋាន Euro 5 រួចបានដាក់បង្ហាញកំណែទម្រង់ Euro 5+ ឡើងវិញក្នុងឆ្នាំ 2021 នេះ។