ក្រុមហ៊ុន Toyota មានរថយន្តប្រភេទ Off-road ច្រើនលើសលប់ រាប់ចាប់តាំងពីប្រភេទ TRD កម្លាំងខ្លាំងលើរថយន្ត Truck រហូតដល់រថយន្ត SUV ស្ទើរតែគ្រប់ម៉ូដែល។ មិនត្រឹមតែ 4Runner និង Land Cruiser ប្រើប្រាស់គ្រោងឆ្អឹង (Platform) រួមគ្នាប៉ុណ្ណោះទេ ប៉ុន្តែពួកវាក៏មានគ្រឿងបច្ចេកទេសជាច្រើនដូចគ្នាផងដែរ។ ដូច្នេះ វាអាស្រ័យទៅលើថា តើអ្នកចូលចិត្តរូបរាងបែបបុរាណ (Retro) របស់ Land Cruiser ឬអ្នកចាប់អារម្មណ៍លើម៉ាស៊ីន Hybrid ផ្តាច់មុខរបស់ 4Runner ជាង។ សម្រាប់អ្នកដែលស្រឡាញ់ Land Cruiser តម្លៃសម្រាប់ស៊េរីឆ្នាំ 2027 គឺស្ទើរតែមិនមានការប្រែប្រួលឡើយ ហើយថែមទាំងទទួលបានជម្រើសថ្មីៗគួរឱ្យចាប់អារម្មណ៍មួយចំនួនទៀតផង។

ការប្រៀបធៀបតម្លៃ

ជាដំបូង សូមនិយាយអំពីតម្លៃ។ ស្រឡាយរថយន្ត Land Cruiser ឆ្នាំ 2027 នៅតែមាន 2 ជម្រើសដដែលគឺ៖ ប្រភេទ 1958 Edition និងប្រភេទ High-spec (ម៉ូដែលខ្ពស់ដែលគ្មានឈ្មោះ)។

• ប្រភេទ 1958 ឥឡូវនេះមានតម្លៃចាប់ផ្តើមពី 59,375 ដុល្លារសម្រាប់ទីផ្សារក្រៅ​ប្រទេស។
• ប្រភេទ High-spec មានតម្លៃចាប់ផ្តើមពី 65,450 ដុល្លារសម្រាប់ទីផ្សារក្រៅប្រទេស។

តម្លៃទាំងពីរនេះបានកើនឡើងត្រឹមតែ 280 ដុល្លារ ប៉ុណ្ណោះ បើធៀបនឹងឆ្នាំមុន។ ទោះជាយ៉ាងណាក៏ដោយ តម្លៃនេះនៅតែខ្ពស់ជាង 4Runner ម៉ូដែល TRD Off-Road។ សម្រាប់ឆ្នាំ 2026 ម៉ូដែលមិនមែន Hybrid របស់ 4Runner ចាប់ផ្តើមពី 51,985 ដុល្លារ និងប្រភេទ Hybrid ចាប់ផ្តើមពី 54,785 ដុល្លារ ប៉ុន្តែតម្លៃអាចហក់ឡើងខ្ពស់ខ្លាំង ប្រសិនបើអ្នកជ្រើសរើសប្រភេទខ្ពស់ដូចជា 4Runner TRD Pro ដែលមានតម្លៃរហូតដល់ 69,895 ដុល្លារ។

ជម្រើសថ្មីដែលគួរឱ្យចាប់អារម្មណ៍

អ្វីដែលគួរឱ្យចាប់អារម្មណ៍ជាងការឡើងថ្លៃបន្តិចបន្តួចនោះ គឺជម្រើសថ្មីដែលមាននៅលើ Land Cruiser។ ឥឡូវនេះ អ្នកអាចកុម្ម៉ង់រថយន្តដែលមានបំពាក់ បំពង់បឺតខ្យល់លើខ្ពស់ (Raised air intake) ដូចទៅនឹងអ្វីដែល Toyota បំពាក់លើ 4Runner Trailhunter ដែរ។ ជម្រើសបន្ថែមនេះមានតម្លៃ ៩៨០ ដុល្លារ។ ប៉ុន្តែសូមកុំច្រឡំវាជាមួយបំពង់ Snorkel ដែលប្រើសម្រាប់បង្កើនសមត្ថភាពចុះទឹកឱ្យបានជ្រៅ ព្រោះបំពង់នេះមិនមានការការពារជិតមិនឱ្យទឹកចូលនោះទេ (ទោះបីជាមានអ្នកប្រើប្រាស់ក្នុងបណ្ដាញសង្គមខ្លះនិយាយថាអាចប្រើ Flex Seal បិទបានក៏ដោយ)។

លក្ខណៈពិសេសថ្មីមួយទៀតគឺស្ថិតនៅក្នុងកញ្ចប់ Premium package ដែលឥឡូវនេះបានបន្ថែមមុខងារ កម្តៅ និងខ្យល់ចេញចូលកៅអី សម្រាប់អ្នកដំណើរជួរក្រោយ។ ទោះជាយ៉ាងណាក៏ដោយ ការបន្ថែមជម្រើស Premium នេះ តម្រូវឱ្យអ្នកចំណាយបន្ថែម ៤,៩០៥ ដុល្លារ (កើនឡើង ៥៥០ ដុល្លារ ធៀបនឹងឆ្នាំមុន) ហើយវាមានផ្តល់ជូនសម្រាប់តែម៉ូដែល Land Cruiser ដែលមានតម្លៃថ្លៃប៉ុណ្ណោះ៕