ក្រុមហ៊ុន Xiaomi បានដាក់សម្ពោធជាផ្លូវការនូវរថយន្ត SU7 កំណែអាប់ដេតថ្មី (Refresh) ឆ្នាំ 2026 កាលពីថ្ងៃទី 19 ខែមីនា ដោយទទួលបានការកុម្ម៉ង់ទិញរហូតដល់ 15,000 គ្រឿង ក្នុងរយៈពេលត្រឹមតែ 34 នាទីប៉ុណ្ណោះ។ កំណែអាប់ដេតនេះមាន 3 ជម្រើសគឺ Standard, Pro, និង Max ដែលមានតម្លៃចន្លោះពី 31,870 ដល់ 43,950 ដុល្លារអាមេរិក។ អតិថិជនត្រូវកក់ ប្រាក់ចំនួន 725 ដុល្លារ ដើម្បីធានាការបញ្ជាទិញ ហើយអាចកែប្រែព័ត៌មានលម្អិត បានរហូត ដល់ថ្ងៃទី 22 ខែមីនា។

រថយន្ត SU7 ជំនាន់ដំបូងគឺជាឡានអគ្គិសនីផលិតទ្រង់ទ្រាយធំដំបូងបង្អស់របស់ Xiaomi ដែលត្រូវបានណែនាំកាលពីខែធ្នូ ឆ្នាំ 2023 ជាមួយនឹងចម្ងាយបើកបរ 800 គីឡូម៉ែត្រ (CLTC) និងការស្ទុះពី 0-100 គីឡូម៉ែត្រ/ម៉ោង ក្នុងរយៈពេល 2.78 វិនាទី។

រូបរាងខាងក្រៅ និងផ្នែកខាងក្នុង

រថយន្ត SU7 ស៊េរីឆ្នាំ 2026 នេះមានការរចនាប៉ាណាខាងមុខថ្មី ដោយរួមបញ្ចូលនូវរ៉ាដា 4D mm-wave និងប្រព័ន្ធលាងសម្អាតសម្ពាធខ្ពស់សម្រាប់កាមេរ៉ាមុខ និងក្រោយ។ ការផ្លាស់ប្តូរ ខាងក្រៅផ្សេងទៀតរួមមាន កញ្ចក់មើលក្រោយពណ៌ខ្មៅ, កង់ទំហំ 21អ៊ីញប្រភេទ Forged wheels និងដង្កៀបហ្វ្រាំងពណ៌ក្រហម។ វាមាន 9 ពណ៌សម្រាប់ជ្រើសរើស ហើយសម្រាប់ ប្រភេទ Max នឹងមានពណ៌ពិសេសគឺ Cabrio Blue។

ផ្នែកខាងក្នុងត្រូវបានបន្ថែមនូវការតុបតែងពណ៌ខ្មៅ Dark Night ជាស្តង់ដារ, ភ្លើង Ambient lighting 3 ស្រទាប់ និងស្រោបស្បែក Nappa លើចង្កូត។ កៅអីខាងមុខអាចសារ៉េបាន 18 ទិសដៅ ជាមួយមុខងារម៉ាស្សា និងជំនួយផ្នែកចំហៀង ចំណែកកៅអីក្រោយ ឥឡូវនេះមាន មុខងារ Zero-gravity (បែបគ្មានទម្ងន់) និងកន្លែងកល់ក្បាលដែលបានកែលម្អ។ ប្រភេទ Max បន្ថែមនូវដំបូលកញ្ចក់ Panoramic ដែលអាចសារ៉េពន្លឺបានឆ្លាតវៃ។

កម្លាំងម៉ាស៊ីន និងចម្ងាយបើកបរ

គ្រប់ជម្រើសទាំងអស់ប្រើប្រាស់ម៉ូទ័រ V6s Plus ដែលមានប្រសិទ្ធភាពបញ្ជូនថាមពលដល់ទៅ 94%។ ប្រភេទ Max អាចស្ទុះពី 0-100 គីឡូម៉ែត្រ/ម៉ោង ក្នុងរយៈពេល 3.08 វិនាទី និងមាន ល្បឿនអតិបរមា 265 គីឡូម៉ែត្រ/ម៉ោង។ ចម្ងាយបើកបរ (CLTC) រួមមាន៖

• Standard: 720 គីឡូម៉ែត្រ (ប្រើប្រព័ន្ធភ្លើង 752 វ៉ុល)
• Pro: 902 គីឡូម៉ែត្រ (ប្រើប្រព័ន្ធភ្លើង 752 វ៉ុល)
• Max: 835 គីឡូម៉ែត្រ (ប្រើប្រព័ន្ធភ្លើង 897 វ៉ុល)

បច្ចេកវិទ្យាសាកភ្លើងល្បឿនលឿនលើប្រភេទ Max អាចសាកភ្លើងត្រឹម 15 នាទី រត់បាន ចម្ងាយ 670 គីឡូម៉ែត្រ ឬសាកពី 10% ទៅ 80% ក្នុងរយៈពេលតែ 12 នាទីប៉ុណ្ណោះ។

គ្រោងឆ្អឹង អេឡិចត្រូនិក និងសុវត្ថិភាព

Xiaomi ប្រើប្រាស់គ្រោងឆ្អឹងដែលមានឈ្មោះថា “Dragon Chassis” ជាមួយប្រព័ន្ធ បូមមុខ ប្រភេទ Double-wishbone និងក្រោយ Five-link។ ប្រភេទ Pro និង Max បន្ថែមនូវបូមខ្យល់ (Air springs) និងប្រព័ន្ធបូម CDC ដែលអាចផ្លាស់ប្តូរកម្រិតភាពទន់រឹងបាន។

SU7 ថ្មីនេះ រួមបញ្ចូលប្រព័ន្ធជំនួយការ Super XiaoAI និងម៉ូដែលការយល់ដឹង XLA ដែល ដំណើរការដោយបន្ទះឈីប Snapdragon 8 ជំនាន់ទី3 បូករួមនឹងអង្គគណនា ជំនួយកម្លាំង 700 TOPS។ សម្រាប់សុវត្ថិភាព ប្រភេទ Max បន្ថែមពោងសុវត្ថិភាពដល់ទៅ 9 និងតួខ្លួន រឹងមាំបំផុត។ លក្ខណៈពិសេសផ្សេងទៀតរួមមាន ទូទឹកកកក្នុងឡាន (ទំហំ 4.4 លីត្រ), ប្រព័ន្ធសំឡេង 14 ដល់ 25 គ្រាប់ (Dolby Atmos), ប្រព័ន្ធ 5G និង Wi-Fi 7។

ការត្រៀមខ្លួនសម្រាប់ម៉ូដែល Xiaomi YU7 GT

ក្រៅពីការអាប់ដេត SU7 ក្រុមហ៊ុន Xiaomi ក៏កំពុងពង្រីកស្រឡាយឡានអគ្គិសនីរបស់ ខ្លួនផងដែរ។ យោងតាមសារព័ត៌មាន CNC បានឱ្យដឹងថា Xiaomi កំពុងរៀប ចំចេញលក់ រថយន្ត SUV កម្លាំងខ្លាំងម៉ូដែល YU7 GT ដែលនឹងបំពាក់កម្លាំងរហូតដល់ 990សេះ និង មានគោលដៅបើកបរបាន 705 គីឡូម៉ែត្រ ដើម្បីមកបំពេញបន្ថែមក្នុងគ្រួសារ រថយន្តរបស់ Xiaomi៕