កាលពីថ្ងៃទី 29 ខែធ្នូ ក្រុមហ៊ុន Xpeng បានប្រកាសថា រថយន្ត 2026 Xpeng P7+ របស់ខ្លួននឹងមានផ្តល់ជូនទាំងប្រភេទ BEV (អគ្គិសនីសុទ្ធ) និង EREV (អគ្គិសនីរយៈចម្ងាយ​ឆ្ងាយ) ដោយមានការអាប់ដេតចំនួន 104 ចំណុច និងការរចនាថ្មីស្រឡាងទាំងស្រុង ព្រមទាំងការបើកបររយៈចម្ងាយឆ្ងាញដោយប្រើថាមពលអគ្គិសនីសុទ្ធបានចម្ងាយ 725 គីឡូម៉ែត្រ និងចម្ងាយបើកបរសរុប 1,550 គីឡូម៉ែត្រ (តាមស្តង់ដារ CLTC)។ ក្នុងនាមជាម៉ូដែលសកល រថយន្ត 2026 Xpeng P7+ ក៏នឹងត្រូវដាក់លក់នៅក្នុង 36 ប្រទេស ផងដែរ។ លើសពីនេះ ប្រភេទ BEV នឹងបំពាក់មកជាមួយ Platform 800V និងបច្ចេក វិទ្យាសាកថ្មក្នុងល្បឿនលឿន 5C។

ប្រភេទ EREV នឹងមានរយៈចម្ងាយបើកបរដោយអគ្គិសនីសុទ្ធដល់ទៅ 430 គីឡូម៉ែត្រ ដែលធ្វើឱ្យវាក្លាយជា "រថយន្តសេដាន់ប្រភេទ range-extender ដែលមានចម្ងាយ បើកបរ ដោយអគ្គិសនីសុទ្ធឆ្ងាយជាងគេបំផុតក្នុងពិភពលោក"។ នេះបើយោងតាមព័ត៌មានដែល​បានប្រកាសពីមុន ប្រភេទ EREV មានបណ្តោយប្រវែង​5,071mm ទទឹង​1,937mm និងកម្ពស់​ 1,524mm ជាមួយគម្លាតកង់មុខទៅខាងក្រោយប្រវែង 3,000​ mm និងទម្ងន់រថយន្ត 2,160 គីឡូក្រាម។ ប្រវែងតួខ្លួនត្រូវបានពង្រីកបន្ថែម 15mm បើធៀបនឹង​ប្រភេទ BEV បច្ចុប្បន្ន។ ប្រព័ន្ធបញ្ជូនថាមពលនឹងរួមមានម៉ាស៊ីន 1.5T ជាឧបករណ៍ពង្រីក​ចម្ងាយ ដែលផ្តល់កម្លាំង​អតិបរមា 110 kW (148 សេះ) និងម៉ូទ័រអគ្គិសនីកម្លាំង 180 kW (241 សេះ) បំពាក់មកជាមួយអាគុយលីចូមដែកផូស្វាត (LFP) ដែលអាចបើកបរក្នុងល្បឿន​អតិបរមា 200​ គីឡូម៉ែត្រ/ម៉ោង។

អំពី Xpeng P7+ បច្ចុប្បន្ននៅលើទីផ្សារ

រថយន្ត Xpeng P7+ ត្រូវបានដាក់លក់ជាលើកដំបូងកាលពីខែវិច្ឆិកាកន្លងទៅ ដោយមាន ផ្តល់ជូនតែប្រភេទ BEV ប៉ុណ្ណោះ ក្នុងតម្លៃចន្លោះប្រហែល 26,100 ទៅ 29,700 ដុល្លារអាមេរិក។ វាមានមេគុណទប់ខ្យល់ (drag coefficient) កម្រិត 0.206 Cd។ ស៊េរីមួយនេះគឺជាប្រភេទបើកបរដោយកង់ក្រោយ (RWD) ដំណើរការដោយម៉ូទ័រ permanent magnet synchronous ដែលផ្តល់កម្លាំង ​180 kW (241សេះ)កម្លាំងបង្វិលជុំ​450 Nm ឬ 230kW (308 សេះ)កម្លាំងបង្វិលជុំ 450Nm។ សម្រាប់ជម្រើសអាគុយលីចូមដែកផូស្វាតមានចំនួនបីគឺ៖ 60.7 kWh, 76.3 kWh, និង 74.9 kWh ដែលត្រូវនឹងចម្ងាយបើកបរតាមប្រព័ន្ធស្តង់ដារ CLTC គឺ 615 គីឡូម៉ែត្រ, 725 គីឡូម៉ែត្រ និង 685 គីឡូម៉ែត្រ។

ម៉ូដែលកម្រិតខ្ពស់បំផុត (Top-of-the-line) អាចសាកថ្មល្បឿនលឿន 5C ខណៈម៉ូដែលផ្សេង​ទៀតអាចសាកថ្មកម្រិត 3C ដែលចំណាយពេលត្រឹមតែ 12 នាទី និង 20 នាទី ដើម្បីសាកថ្មពី 30% ទៅ 80% ។ ឃ្លុបដាក់អីវ៉ាន់ខាងក្រោយមានចំណុះស្តង់ដារ 725 លីត្រ និងអាចបន្ថែម​បានរហូតដល់ 2,221 លីត្រ។ ចាប់តាំងពីពេលដាក់​លក់កាលពីមួយឆ្នាំមុ​ន​Xpeng P7+ បានលក់លើសពី 88,000 គ្រឿង រហូតមកដល់បច្ចុប្បន្ននេះ និងបានគ្រងតំណែង​ជាជើងឯកផ្នែកលក់រថយន្តសេដាន់អគ្គិសនីសុទ្ធទំហំមធ្យមទៅទំហំធំ ក្នុងកម្រិតតម្លៃពី ប្រហែល 21,300 ទៅ 28,500 ដុល្លារអាមេរិក រយៈពេល 12 ខែជាប់ៗគ្នា៕​