ក្រុមហ៊ុន Xpeng (NYSE: XPEV) បាន​ប្រកាស​នៅ​ថ្ងៃនេះ​ថា រថយន្ត MPV (multi-purpose vehicle) X9 EREV (extended-range electric vehicle) របស់​ខ្លួន នឹង​សម្ពោធ​ជា​ផ្លូវការ​នៅ​សប្តាហ៍​ក្រោយ ហើយ​បាន​បង្ហាញ​ពី​លក្ខណៈ​ពិសេស​បន្ថែម​សម្រាប់​ម៉ូដែល​នេះ។

ក្រុមហ៊ុន​ផលិត​រថយន្ត​អគ្គិសនី (EV) នេះ​មិន​បាន​បញ្ជាក់​ពី​កាលបរិច្ឆេទ​ពិតប្រាកដ​នោះ​ទេ ប៉ុន្តែ​វា​ត្រូវ​បាន​គេ​រំពឹង​ថា​នឹង​ធ្វើឡើង​នៅ​ថ្ងៃទី ៥ ខែ​វិច្ឆិកា ដែល​ជា​ពេល​ដែល​ក្រុមហ៊ុន​នឹង​រៀបចំ​ព្រឹត្តិការណ៍ 2025 AI Day របស់​ខ្លួន។

រថយន្ត X9 EREV គឺ​ជា​រថយន្ត ៧ កៅអី​ ប្រភេទរថយន្ត​ MPV (Long Range)ដែលវែង​ជាងគេ​បំផុត​លើ​ពិភពលោក ដោយ​មាន​ចម្ងាយ​បើកបរ​រួម​បញ្ចូល​គ្នា (CLTC combined range) រហូតដល់ 1,602 គីឡូម៉ែត្រ នេះ​បើ​យោង​តាម​ការ​លើកឡើង​របស់ក្រុមហ៊ុនរថយន្ត Xpeng នៅ​លើគេហទំព័រ Weibo នា​ថ្ងៃនេះ។ វា​មាន​ចម្ងាយ​បើកបរ​ដោយ​អាគុយ 452 គីឡូម៉ែត្រ ដែល​ជា​ចម្ងាយ​ឆ្ងាយ​បំផុត​ក្នុង​ចំណោម​ម៉ូដែល ៧ កៅអី​កូនកាត់​ធំៗ​ទូទាំង​ពិភពលោក​ផង​ដែរ។

រថយន្ត X9 EREV ក៏​ជា​ម៉ូដែល ៧ កៅអី​ធំ​ដែល​មាន​ថាមពល​គណនា AI ខ្លាំង​បំផុត​ក្នុង​ពិភពលោក​ផង​ដែរ ដោយ​បំពាក់​ដោយ​ឈីប​បើកបរ AI Turing ដែល​ខ្លួន​បាន​បង្កើត​ឡើង​ចំនួន បី និង​ឈីប​កន្លែងបើកបរ (cockpit chip) Qualcomm Snapdragon 8295P មួយ។ ថាមពល​គណនា​ការ​បើកបរ​ឆ្លាតវៃ​របស់​រថយន្ត​នេះ​ឈាន​ដល់ 2,250TOPS ដែល​ស្មើ​នឹង​ឈីប Nvidia Orin-X ចំនួន​ប្រាំបួន។

ក្រុមហ៊ុន Xpeng បាន​ដាក់​បង្ហាញ Kunpeng Super Electric System របស់​ខ្លួន​នៅ 2024 AI Day កាលពី​ខែ​វិច្ឆិកា ឆ្នាំ 2024។ រថយន្ត X9 EREV នឹង​ក្លាយ​ជា​ម៉ូដែល EREV ដំបូង​គេ​ដែល​ប្រើប្រាស់​ប្រព័ន្ធ​នេះ។

កាលពី​ដើម​ខែ​នេះ ក្រុមហ៊ុន Xpeng បាន​និយាយ​ថា X9 EREV បំពាក់​ដោយ​អាគុយ​ទំហំ 63.3 គីឡូវ៉ាត់​ម៉ោង (kWh) និង​ធុង​ប្រេង 60លីត្រ ដែល​ផ្តល់​ចម្ងាយ​បើកបរ​រួម​បញ្ចូល​គ្នា 1,602 គីឡូម៉ែត្រ។

រថយន្ត X9 ត្រូវ​បាន​ដាក់​លក់​ដំបូង​នៅ​ប្រទេស​ចិន​នៅ​ថ្ងៃទី 01 ខែ​មករា ឆ្នាំ 2024 ដែល​ជា​ម៉ូដែល MPV ដំបូង​របស់ Xpeng។ ម៉ូដែល​នេះ​ក៏​តំណាង​ឲ្យ​រថយន្ត​ដែល​មាន​តម្លៃ​ថ្លៃ​បំផុត​របស់ Xpeng ផង​ដែរ ដោយ​បច្ចុប្បន្ន​មាន​តម្លៃ​ចាប់ផ្តើម 359,800 យន់ ($50,610) នៅ​ប្រទេស​ចិន។

ម៉ូដែល EREV នៃ X9 បាន​បង្ហាញ​ខ្លួន​ក្នុង​សៀវភៅកាតាឡុក​បទប្បញ្ញត្តិ​នៅខែ​សីហា​របស់​ក្រសួង​ឧស្សាហកម្ម និង​បច្ចេកវិទ្យា​ព័ត៌មាន (MIIT) របស់​ចិន ដោយ​បង្ហាញ​ពី​ទំហំ​ប្រវែងរថយន្ត​ 5,316mm ទទឹង 1,988mm និង​កម្ពស់ 1,785mm ព្រមទាំង​មាន​គម្លាត​កង់ (wheelbase) 3,160mm។ វា​មាន​ប្រវែង​វែង​ជាង Xpeng X9 អគ្គិសនី​សុទ្ធ​ដែល​មាន​ប្រវែង 5,293mm ខណៈ​ដែល​ទំហំ​ផ្សេង​ទៀត​នៅ​តែ​ដូចគ្នា។

ក្រុមហ៊ុន Xpeng ក៏បាន​ដាក់​ពាក្យ​ស្នើសុំបន្ថែម​សម្រាប់​ម៉ូដែល EREV នៃ​រថយន្ត SUV G7 របស់​ខ្លួន​កាលពី​ខែ​មុន និង​បាន​ដាក់​ពាក្យ​ស្នើសុំ​បន្ថែមមួយទៀតសម្រាប់​ម៉ូដែល EREV នៃ​រថយន្ត SUV G6 និង P7+ ប្រភេទរថយន្តសេដាន់ (Sedan) ​កាលពី​ដើម​ខែ​នេះ​ផង​ដែរ៕